Шатахуун импортлогчид өнгөрсөн амралтын өдрүүдээр АИ-92 бензин, дизель түлшний үнийг огцом нэмж ард иргэддээ наадмын сюрприз барилаа. Тэд үгсэн хуйвалдсан уу, үнэхээр хомсдол үүссэн үү мэдэхгүй. Дизель түлш 1650 байсныг 1750, АИ-92 бензинийг 100 төгрөгөөр огцом нэмж литрийг нь 1500 төгрөгт хүр­гэжээ. Энэ нь шатахууны нийлүүлэлт хэвийн болж, үнийн хөөрөгдөл ааж­маар буурна гэж тооцоолж байсан олон хүнд  санамсаргүй цохилт болов. Учир нь, эрх мэдэлтнүүд зургадугаар сарын 10 гэхэд Монгол Улс шатахуу­ны хомсдлоос бүрэн ангижирч, байдал хэвийн болно гэж мэдэгдсэн. Үүнийгээ бүр УИХ-ын Байнгын хорооны хурал дээр мэдэгдэж, ги­шүүдийн өмнө цаад тал нь зургаду­гаар сарын 10 гэж хугацаа товлож байлаа. Түүнчлэн Газрын тосны газрын дарга Д.Амарсайхан өнгөрсөн тавдугаар сард хэвлэлд ярилцлага өгөхдөө, “зургадугаар сарын 5 гэхэд дизель түлшний нийлүүлэлт хэвийн болно.

ОХУ-аас нийтдээ 91 мянган тонн түлш татах учир Монгол Улс гурван сарынхаа хэрэглээний түлштэй болно” хэмээн итгэлтэй мэдэгдэж байв. Мөн энэ сарын 1-ний өдөр УИХ-ын Эдийн засгийн байнгын хорооны хуралдаанаар шатахууны хомсдлын талаар хэлэлцэх үеэр ЭБЭХЯ-ны Түлшний бодлогын газрын орлогч дарга Г.Болдхүү, “Энэ сарын 6, цаанадаа 10 гэхэд дизель түлшний нийлүүлэлт хэвийн болно” гэж мэдэгдэж байлаа. Гэвч бодит байдалд тэдний хэлсэн бүхэн эсрэгээр эргэж, нэмэр дээр нэрмээс гэгчээр шатахууны хомсдол, АИ-92 бензинээр хүрээгээ тэлэв. Аль тавдугаар сард л ЭБЭХ-ний сайд Д.Зоригт ОХУ-ын Эрчим хүчний орлогч сайд Сергей Иванович Кудряшовт захидал бичиж Монгол Улсад нийлүүлэх газрын тосны бүтээгдэхүүний нийлүүлэлтийг тасалдуулахгүй, хэрэгцээт хэмжээгээр нийлүүлэх талаар арга хэмжээ авахыг хүссэн. ОХУ-ын Ерөнхийлөгч Д.И.Медведев ч Монголд нийлүүлэх шатахууны асуудалд онцгой анхаарахаа Ц.Элбэгдорж Ерөнхийлөгчид хэлж байлаа. Үүнээс гадна ЭБЭХ-ний сайд Д.Зоригт шатахууны нэмэлт эх үүсвэр олохоор БНХАУ-руу нисч, ЭБЭХ-ний дэд сайд Б.Ариунсангаар ахлуулсан баг аль тавдугаар сарын 11-13-нд Москвад очиж, “Роснефть”-ээс 8000 тонн, “ТНК-БП” компаниас 16000 тонн дизель түлш авахаар гэрээ хэлцэл хийгээд ир­сэн. Тухайн үед албаны хүмүүс “ТНК-БП” компаниас авч байгаа түлш 5400 километрийн алсаас ирж яваа зургадугаар сарын 10 гэхэд Монгол Улсын хилээр орж ирнэ гэж ард түмнийг тайвшруулж байсан. Замд яваа гэх шатахуун хаана явна вэ. Үүнд хэн гэгч ямар албан тушаалтан анхаарал тавьж байна. Албан тушаалт­нуудын хоосон амлалтаар иргэдийн автомашины банк бе­нзин, түлшээр дүүрэхгүй шүү дээ. Тэдний ажил ам­лалт хоёр зөрж буй нь өнгөрсөн амралтын өдрүүдээр бен­зин, түлшний үнэ нэгэн зэрэг нэмэгдсэнээс харагдаж байна. Шатахууны хомсдлоос үүдэлтэй өргөн хэ­рэглээний барааны үнийн өсөлт ч мэдрэгдэж эхэллээ. Түүнчлэн инфляц өссөн талаар эдийн засагчид ярьж эхлэв. Байдал ийм байхад худлаа хэлж, хоосон амласан Газрын тосны газрын дарга Д.Амарсайхан, ЭБЭХЯ-ний Түлшний бодлогын газрын орлогч дарга Г.Болдхүү нараас та бүхний зургадугаар сард орж ирнэ гэж амлаад байсан дизель түлш хаана явааг асууя. Хэвийн болно гэж тэдний амласан хугацаа гурван өдрөөр хэтэрлээ. Гэтэл хэвийн болох нь битгий хэл дизелийн хомсдол АИ-92 бензинээр хүрээгээ тэлж, дээр нь үнэ огцом нэмэгдлээ. Түлш­ний­хээ асууд­лыг ч шийдэж чадаагүй байхад АИ-92 бен­зин ховордлоо. Хамгийн гол нь үнэнийг мэдмээр байна. Үнийг үгсэн хуйвалдаж нэмэв үү, үнэхээр хомс­дол үүсэв үү. Хэрвээ хомсдол үүссэн бол үүнээс хэ­зээ гарах вэ. Харин үгсэн хуйвалдаж нэмсэн бол зуд болоход нохой зоолно, зовлон болоход лам таргална гэдэг шиг үнийн хөөрөгдлөөр ашиг олж буй импорт­логчдыг хянадаг, хариуцлага тооцдог бүтэц гэж байна уу.