Засгийн газрын ээлжит хуралдаан өнөөдөр 16.00 цагт товлогдоод байна. Тус хуралдаанаар 10 гаруй асуудлыг хэлэлцэн шийдвэрлэхээр төлөвлөсний дотор анхаарал татах хуулийн төслүүд багтжээ.
Тодруулбал, Монгол Улсын 2016 оны төсвийн төсөл, түүнтэй холбоотой бусад хуулийн төслүүдийг хэлэлцэхээр төлөвлөөд байна. Хуульд зааснаар Засгийн газар ирэх оны төсвийн төслийг жил бүрийн аравдугаар сарын 1-нд багтаан УИХ-д өргөн мэдүүлэх ёстой.
Мөн энэ өдрийн хуралдаанд Хууль зүйн сайд Д.Дорлигжав Монгол Улс байнга төвийг сахих тухай хуулийн төсөл болон холбогдох бусад хууль, УИХ-ын тогтоолын төслийг хэлэлцүүлэх аж. Уг төслийг Ерөнхийлөгч санаачлан боловсруулжээ.
Анхаарал татах бас нэгэн хуулийн төсөл нь Үндсэн хуульд нэмэлт өөрчлөлт оруулах тухай хуулийн төсөл юм. УИХ-ын төвшинд нэг жил гаруйн хугацаанд бүх намын бүлгээс төлөөлөл оролцсон Үндсэн хуульд нэмэлт өөрчлөлт оруулах тухай хуулийн төслийг боловсруулах үүрэг бүхий ажлын хэсэг байгуулагдан ажилласан юм. Тус ажлын хэсгийг УИХ-ын гишүүн Н.Батбаяр ахлан ажилласан бөгөөд төсөл нь боловсруулагдаж дууссан байна.
Засгийн газрын хуралдаанаар хэлэлцлэх асуудлын дарааллыг дараах хүснэгтээс тодруулж харна уу.
№ | Хэлэлцэх асуудал | Засгийн газрын гишүүн |
1 | Төрийн өмчийн тухай хуулийн төсөл | С.БАЯРЦОГТ |
2 | Монгол Улс, Европын Холбооны хамтарсан хорооны хуралдааны тухай* | С.БАЯРЦОГТ |
3 | Нийтээр тэмдэглэх баярын болон тэмдэглэлт өдрүүдийн тухай хуульд нэмэлт оруулах тухай хуулийн төсөл | С.БАЯРЦОГТ |
4 | Монгол, Канадын дугуй ширээний уулзалтын тухай* | Л.ПҮРЭВСҮРЭН Р.ЖИГЖИД |
5 | Хөрөнгө гаргах тухай | Б.БОЛОР |
6 | Монгол Улсын 2016 оны төсвийн тухай, Хүний хөгжил сангийн 2016 оны төсвийн тухай, Нийгмийн даатгалын сангийн 2016 оны төсвийн тухай болон холбогдох бусад хуулиудын төсөл* | Б.БОЛОР |
7 | Монгол Улсын Ерөнхийлөгчийн санаачлан боловсруулсан Монгол Улс байнга төвийг сахих тухай хуулийн төсөл болон холбогдох бусад хууль, Улсын Их Хурлын тогтоолын төсөлд Засгийн газраас өгөх санал, дүгнэлтийн тухай* | Д.ДОРЛИГЖАВ |
8 | Улсын Их Хурлын гишүүн Н.Батбаяр нарын санаачлан боловсруулсан Монгол Улсын Үндсэн хуульд нэмэлт, өөрчлөлт оруулах тухай хуулийн төсөлд Засгийн газраас өгөх санал, дүгнэлтийн тухай* | Д.ДОРЛИГЖАВ |
9 | Гадаадаас ажиллах хүч, мэргэжилтэн авах тухай | Г.БАЯРСАЙХАН |
10 | Бусад асуудал* | Ч.САЙХАНБИЛЭГ |
Танилцуулах асуудал | ||
11 | 2015 оны эхний хагас жилд иргэдээс төрийн захиргааны төв болон нутгийн захиргааны байгууллага, албан тушаалтанд хандаж ирүүлсэн өргөдөл, гомдлын шийдвэрлэлтийн тухай | С.БАЯРЦОГТ |
12 | Мэдээллийн технологи, шуудах харилцаа холбооны салбарт хэрэгжүүлж байгаа томоохон төсөл, хөтөлбөрийн тухай | С.БАЯРЦОГТ |
13 | Хүн амын хөгжил, нийгмийн хамгааллын сайдын гадаад томилолтын тухай | С.БАЯРЦОГТ |
14 | Аж үйлдвэрийн сайдын гадаад томилолтын дүнгийн тухай | Д.ЭРДЭНЭБАТ |
15 | Хөдөлмөрийн салбарт хэрэгжиж байгаа төсөл, хөтөлбөрийн тухай | Г.БАЯРСАЙХАН |
Г.ДАРЬ
