Бид “дошин дээрээ атаман байх” гээчийг жинхэнэ утгаар нь үзүүлдэг болжээ. Төрийн өмчийн хорооны үүдэнд өчигдөр түр саатах зуур тун омогшил төрүүлэхээр зүйл үзэв. Төрийн өмчийн хорооны дарга Д.Сугартай уулзахаар Японоос төлөөгчид иржээ. Сураг тавибал Японы “Тоёо” компани, тус улсын Монгол Улс дахь Элчин сайдын яамны төлөөлөгчид болж таарлаа. Харин тэд орж ирснээсээ хойш 10 минут гаруй хугацаанд Д.Сугар даргыг хүлээн үүд сахин зогсоцгоолоо. Тэднийг хүлээх зуур төрийн хувцас өмссөн хамгаалалтын албаныхан маань малгайгаа ч өмсөлгүй, таахалзан сууж байв. Харин япончуудыг дагуулж яваа орчуулагч эмэгтэй нэлээд ичиж байгаа харагдлаа. Учир нь тэд Д.Сугар даргатай 11.00 цагт уулзах байж л дээ. Япончууд эхнээсээ залхаж эхлэв бололтой гар цүнхээ газар тавиад зогсоцгоолоо. Ядахдаа цайны газраас хоолны үнэр түгж байсан нь япончуудыг тавгүйтүүлж байв. Арга ч үгүй биз. Тэд цагийн хуваарьтай хооллодог, дээр нь Засгийн газрын байранд хоолны үнэр гарах ёсгүй гэсэн итгэл үнэмшилтэй байдаг хүмүүс шүү дээ. Гэхдээ яая гэхэв. Нэгэнт л Д.Сугар даргын “дош” юм чинь цаг барих эсэх нь түүний хэрэг. Тийм болоод л цагаа барихгүй жаахан гэдийгээ биз Тун саяхан даа. Солонгос-Монголын бизнес форум боллоо. Форумд Солонгосын эдийн засаг, бизнесийн нэр хүндтэй төлөөлөгчид ирэв. Манай талаас Ерөнхий сайд, Сангийн дэд сайд, Үндэсний хөгжил шинэтгэлийн хорооны дарга нарын нэр нөлөөтэй эрхмүүд очлоо. Форумыг солонгосчууд зохион байгуулж байсан болохоор зохион байгуулалтын хувьд өөлөх зүйлгүй байв. Харин манай Үндэсний хөгжил, шинэтгэлийн хорооны дарга өөрөө бэлдсэн үү, хүнээр бичүүлсэн үү гэлтэй илтгэлээ индэр дээр гарч бушуухан хэлчихээд эргээд суудалдаа ч суулгүй, үүд рүү чиглэн яарлаа. Мань эр гадныхнаас, тэр тусмаа хөрөнгө оруулагчдаас залхсан байх. Бараг л гүйгээд гарсан даа. Энэ мэтээр бид Монголдоо сайхан амьдрах цаг иржээ. Хэдхэн жилийн өмнө гадныхныг царайчлахаас өөр зүйл мэддэггүй байсан бид өнөөдөр ямар ч хөрөнгө оруулагчийг “амбаардаад”, алгадаад явуулчихаар чадалтай болжээ. Бахархах, омогших сэтгэл ямар ихээр төрж байна гээч. Зүгээр ч юм уу.
Т.ЕСӨН-ЭРДЭНЭ
Эх сурвалж: "Улс төрийн тойм" сонин