Хэнтий аймгийн хэмжээнд энэ оны эхний таван сарын байдлаар нийт 622 эх амаржсан нь өнгөрсөн оны мөн үеэс гурав өссөн байна. Бор-Өндөр, Биндэр, Баянмөнх, Баян-Адарга, Мөрөн суманд төрөлт нэмэгдэж, бусад сумдад буурчээ. Он гарсаар нийт 628 шинэ иргэний мэндэлсний 53,5 хувь нь эрэгтэй, 46,5 хувь нь эмэгтэй байна. Нялхсын эндэгдлийн 12 тохиолдол бүртгэгдсэн нь өнгөрсөн оны мөн үетэй ижил байгаа ба нийт төрсөн 1000 хүүхдэд 19,1 хувь ногдож, улсын дунджаас илүү байгаа юм. Нялхсын эндэгдлийн 42 хувь нь 0-7 хоногтойдоо, 58 хувь нь сараас дээш хоногтойдоо энджээ. Тав хүртэлх насандаа 21 хүүхэд эндсэн нь нэг тохиолдлоор өсч нийт төрсөн 1000 хүүхдэд ногдох үзүүлэлт 33,4 байгаа нь өнгөрсөн оны мөн үеэс 1,2, улсын дунджаас 10,9 промилоор илүү байна.Тус аймгийн хэмжээнд энэ хугацаанд эмнэлэгт нийт 7378 хүн хэвтэн эмчлүүлж, амбулаторт 136136 хүн үзүүлжээ. Халдварт бус 13290 өвчлөл бүртгэгдсэн нь өнгөрсөн оны мөн үеэс 17 хувь нэмэгдсэн аж. Хорт хавдрын хяналтанд 242 хүн бүртгэгдсэнээс нас барсан 36 тохиолдол байна. 510 халдварт өвчин бүртгэгдэж 10000 хүнд 72,7 ногдож, өнгөрсөн оны мөн үеэс 49 хүнээр өсчээ. Халдварт өвчний гаралт Биндэр, Галшар, Мөрөн, Баянхутаг, Дадал, Өлзийт, Хэрлэн суманд улс аймгийн дунджаас өндөр байна.
Бүх халдварт өвчнийг өнгөрсөн оны мөн үетэй харьцуулахад бэлгийн замаар дамжих халдвар 181 буюу 39 тохиолдлоор, гепатит 106 буюу 16 тохиолдлоор, салхинцэцэг 72 буюу 69 тохиолдлоор, бруцеллёз 51 буюу 22 тохиолдлоор, гахайн хавдар 9 буюу 4 тохиолдлоор тус тус өсчээ. Нийт халдварт өвчнүүдийн 35 хувь нь бэлгийн замаар дамжих халдвар, 20 хувь нь вируст гепатит, 15 хувь нь сүрьеэ, 14 хувь нь салхинцэцэг, 10 хувь нь бруцеллёз, 2,5 хувь нь цусан суулга, 1,7 хувь нь гахайн хавдар эзэлж байна. Вируст гепатит өнгөрсөн оны мөн үеэс 15 хувь нэмэгдсэн ба өвчлөл Биндэр, Бор-Өндөр, Өмнөдэлгэр, Дадал, Баян-Адарга, Хэрлэн суманд улс аймгийн дунджаас өндөр үзүүлэлттэй гарчээ.
