Монгол улсын гадаад худалдаа оны эхнээс огцом өссөн дүн гарсан билээ. Нүүрсний экспорт л гэхэд өнгөрсөн жилийн мөн үеийнхээс 56 хувиар өсчээ. Харин дэлхийн хаана ч гологдохгүй коксжих нүүрсээ бид тонныг нь найман ам.доллараар урд хөршид худалдаж байгаа. Гэтэл манай хөрснөөс малтаж гаргасан энэхүү нүүрстэй чанараараа дүйх нүүрсийг Австраличууд тонныг нь 200 хүртэлх ам.доллараар дэлхийн зах зээлд нийлүүлж байгаа юм. Тиймээс бид БНСУ-руу нүүрс экспортлох боломжийг эрэлхийлэх цаг нь иржээ. Уулзалтын үеэр солонгосчууд энэ асуудлыг нухацтай авч үзэхийг монголын талын төлөөлөгчдөд санал болгож байлаа. Солонгосчууд өнөөдөр Монголд бизнес эрхлээд, хамтарч ажиллаад байгаа нь тийм ч олон биш болов уу. Одоогоор цөөн тооны барилга угсралтын компани, хоолны газар төдийхнөөр хязгаарлагдаж байна. Гэхдээ солонгосчууд бидэнд зайлшгүй хэрэгтэй төмөр зам, нүүрс боловсруулах үйлдвэрийг барьж өгөх бүрэн чадамжтай юм.
Форумын талаар “Мэйл Кёнгжэ” хэвлэлийн группийн захирал Дае Ван Чанаас зарим зүйлийг тодрууллаа.
-Танай улсаас форумд оролцохоор хэдэн төлөөлөгч ирсэн бэ. Уулзалтын зорилго юу байв?
-Монголд анх удаа зохион байгуулж буй уг форумд манай улсаас 40 гаруй компанийн 60 гаруй төлөөлөгч хүрэлцэн ирлээ. Солонгосын Эрдэс баялаг, нүүрсний салбарын корпорациуд голчлон оролцож байна. Мөн санхүүгийн салбарын компаниуд ч цөөнгүй бий. Солонгос Улсад баялаг хэрэгтэй. Харин танай улсын хувьд дэлхийд баялгаараа эхний аравт ороод байгаа. Тиймээс хоёр улсын хооронд бие биеэ нөхсөн эдийн засгийн харилцаа байх ёстой.
-Манай улсын аль салбарт хөрөнгө оруулалт хийх сонирхолтой байна вэ?
-Уул уурхай, зам тээвэр, барилгын гээд олон корпорацийн төлөөлөгчид ирээд байна. Тухайлбал, “Lotte engeenering and construction”, “Corea resourses corporation” зэргийг энд онцолмоор байна. Мөн хөрөнгийн болон санхүүгийн салбарынхан хүрэлцэн ирсэн.
Уулзалтын үеэр Эдийн засагч Н.Дашзэвэг, “Солонгос Улс жижиг дунд үйлдвэрээс эхлээд хүнд үйлдвэр, мэдлэг шингэсэн технологийн хөгжлөөрөө дэлхийд нэр хүндтэй. Ялангуяа эдийн засгийн хувьд ганцхан харилцагчтай манай улс солонгосчуудтай хамтрах шаардлагатай” хэмээсэн юм. Мөн Уул уурхайн ассоциаци, Монголын үндэсний худалдаа аж үйлдвэрийн танхимын ерөнхийлөгч нар “Уул уурхайн салбарт солонгосчуудаас бид хангалттай зүйлийг суралцана. Ядаж л нөхөн сэргээлтээ 70 хувьд хүргэх боломжтой” хэмээсэн юм. Мөн Сангийн дэд сайд Ч.Ганхуяг “Бид Солонгост монголчуудаа хөдөлмөрлүүлэхээс өөр зүйл хийдэггүй. Хамтын ажиллагаа алга гэж хэлэх хүмүүс цөөнгүй байна. Гэхдээ эдийн засаг тэлж, их өөрчлөлт гарах цаг ирж байна шүү дээ. Өнөөдрийг хүртэл экспорт, импортын зөрүү, гадаад худалдаа алдагдалтай байдаг байсан бол тун удахгүй тогтворжих төрх харагдаж байна. Харин тухайн үед бид байгалийн баялгаа мөнгө болгоод дотооддоо шингээх, үрэх бус түүнийгээ сангуудад хуваарилж, зөв хөрөнгө оруулалт хийх шаардлага гарна. Магадгүй бид Солонгост хөрөнгө оруулалт хийгээд “Daewoo”, “Samsung” корпорациудын хувьцаанаас ч хувь эзэмших цаг ирнэ шүү дээ. Тийм болохоор л эдийн засгийн загварын хувьд бид солонгосчуудаас сурах зүйл их байгаа гэж хэлээд байна” гэлээ.
Эх сурвалж: "Улс төрийн тойм" сонин