БНХАУ-ын CCTV телевиз наймдугаар сарын 12-23-нд Шинжинь хотноо болох дэлхийн оюутны спортын зуны 26 дугаар Универсиад их наадмыг Хятад, Англи, Испани, Франц, Араб, Орос зэрэг зургаан хэл дээр шууд дамжуулахаар болсон байна. 2008 оны Бээжингийн олимпийн наадам, 2010 оны Гуанжоугийн Азийн наадмын үеэр ажиллаж байсан туршлагатай 350 хүний бүрэлдэхүүнтэй баг шууд дамжуулах ажилд оролцох ажээ.  

CCTV-гийн спортын суваг нь наадмын нээлт, хаалтын ёслолын арга хэмжээг шууд дамжуулахаас гадна усан спорт, гимнастик, ширээний теннис, хүндийн өргөлт, буудлага, бадминтон зэрэг спортууд БНХАУ-д илүү өргөн хүрээнд хөгжсөн учир эдгээр төрлүүдийн тэмцээнүүдийг шууд дамжуулахаар шийдвэрлэжээ. Спортын тэмцээнүүдээс гадна наадамд оролцож буй тамирчин, төлөөлөгчидтэй хийсэн ярилцлага, тамирчдын ялалтын талаарх мэдээлэлүүдийг бэлтгэн  өдөр бүрийн хөтөлбөртөө оруулан гаргаж байхаа мөн мэдэгдсэн байна.