Архив EPA/Rodong Sinmun

АНУ-ын эх газарт хүрэх чадалтай пуужинг туршихаар БНАСАУ бэлтгэж байгаа тухай Өмнөд Солонгосын "Чунан ильбо" сонин бичжээ.

"Хойд Солонгос энэ жилийн эхний хагаст пуужингийн шинэ хөдөлгүүрийг хоёр ч удаа туршлаа” гэж БНСУ-ын засгийн газар дахь нэрээ нууцалсан эх сурвалж сонинд мэдээлжээ. Түүний хэлснээр одоо БНАСАУ-ын бүтээж буй шинэ пуужин АНУ-ын эх газарт хүрэх чадалтай. Хөдөлгүүрийн туршилтаас дүгнэх юм бол шинэ пуужин "Ынха-3" зөөгчөөс том бөгөөд 10 мянга орчим км-ийн тусгалтай гэж эх сурвалж дүгнэжээ. Энэхүү пуужинг ирэх аравдугаар сард турших бололтой гэсэн байна.

Өмнөд Солонгосын Yonhap агентлаг мөн л засгийн газрын эх сурвалжаас иш татан  алсын зайн тусгалтай пуужин хөөргөх шинэ талбайг Хятадын хил орчимд бараг бариад дуусгасан гэв. Пхёнан-Пукто мужийн Тончхан-ри туршилтын талбайд пуужин харвах 67 метрийн өндөртэй суурийг босгоод байгаа нь 30 метрийн "Ынха-3" пуужингаас хоёр дахин том пуужинг харвах боломжтой гэнэ.

Үүний зэрэгцээ, Пхеньян хотын ойролцоох заводод алсын зайн пуужинг угсарч байгаа шинж тэмдгийг Өмнөдийн хиймэл дагуул илэрүүлжээ.

Бэлтгэсэн Ш.МЯГМАР