Өмнөд Солонгосын “Samsung C&T”  компанийн хувьцаа эзэмшигчид “Samsung” группийн эзэмшлийн “Cheil Industries”-ийг  худалдан авах саналыг дэмжлээ. Ингэснээр нэгдэх үйл ажиллагааг хүчтэй эсэргүүцэж байсан “C&T” компанийн гол хувьцаа эзэмшигч болох АНУ-ын “Elliott Associates” компани ялагдал хүлээгээд байгаа юм.

8 тэрбум ам.доллараар үнэлэгдэх худалдан авалтын дүнд “Samsung C&T”-ийн хувьцаа эзэмшигчид нэгж хувьцаа тутамд “Cheil Industries”–ийн 0.35 ширхэг хувьцаа авах боломжтой. Түүнчлэн хууль эрхзүйн үүднээс нэгдэх үйл явц 9-р сарын 1-нд бүрэн хийгдэж дуусах юм байна.

“Samsung” группийн өв залгамжлагч И Жэ Ён нь “Samsung Electronics” дахь өөрийн нөлөөг нэмэгдүүлэхийн тулд бүтцийн өөрчлөлтүүдийг хийж эхэлсэн. Тиймээс ч энэ удаагийн шийдвэр ч түүний төлөвлөгөөний нэг хэсэг гэж ажиглагчид тайлбарлаж байгаа.

“Samsung” групп нь одоогоор 67 салбар компаниас бүрдэж байгаа төдийгүй жилийн орлого нь 250 тэрбум ам.доллараар хэмжигдэж байна.