Зургадугаар сарын 29-ний өдөр Английн Лондон хотноо эхэлсэн “Уимблдон” өндөрлөх шатандаа ирлээ. Өнгөрсөн шөнө тус тэмцээний эмэгтэйчүүдийн хагас шигшээ тоглолтууд болж, АНУ-ын Серена Уильямс, Испанийн Гарбине Мугуруза нар шалгарлаа.

Энэ оны хоёр “Их дуулга”-д дараалан түрүүлж, дэлхийн чансааг тэргүүлсээр байгаа Серена Уильямсийн хувьд шөвгийн наймд Беларусын Виктория Азаренкаг гурван сэт үргэлжилсэн тоглолтод буулган авсан юм. Тэгвэл түүний эсрэг ОХУ-ын Мария Шарапова гарч ирсэн. Гэвч энэхүү тоглолтод Серена хүчтэй байж 6:2, 6:4 онооны харьцаагаар хожиж, шигшээд өрсөлдөх эрхийг авлаа.

Харин нөгөө хэсгээс Испанийн 21 настай залуу теннисчин Гарбине Мугуруза шалгарлаа. Тэрээр хагас шигшээд 13-т эрэмбэлэгдсэн Польшийн Агнешка Радваньскаг 6:2, 3:6, 6:3-аар хожиж, “Их дуулга” тэмцээний оргил амжилтаа үзүүлээд байна.

Испанийн Гарбине Мугуруза Германы А.Кербер, Данийн К.Возниацки нарын шилдэг теннисчдийг гурав, дөрөвдүгээр тойрогт хожжээ.

129 жилийн түүхтэй “Уимблдон”-ы эмэгтэйчүүдийн ганцаарчилсан төрлийн аваргын төлөө дэлхийн манлай теннисчин Серена Уильямс, Испанийн Гарбине Мугуруза нар шалгарлаа.

Өнөө шөнө эрэгтэйчүүдийн хагас шигшээ тоглолтууд болж, шигшээд өрсөлдөх теннисчид тодрох юм.

Ч.БОЛОР