Өнгөрсөн жилийн зургадугаар сарын 1-2-нд БНХАУ-ын Төрийн зөвлөлийн Ерөнхий сайд Вень Зябао Монгол Улсад айлчилсан билээ. Түүний айлчлалын үеэр БНХАУ-ын Засгийн газраас Монгол Улсын Засгийн газарт олгох хөнгөлөлттэй зээлийн асуудлыг Монгол Улс, БНХАУ-ын Засгийн газар харилцан тохиролцсон юм.

Уг асуудлыг өчигдөр УИХ-ын Төсвийн байнгын хорооны хурал­даанаар хэлэлцлээ. БНХАУ-ын Засгийн газраас Монгол Улсын Засгийн га­зарт олгох 500 сая ам.долларын хөн­гө­лөлттэй зээлийг ашиглах тухай Монгол Улсын Сангийн яам, Хятадын Экспорт-Импорт банкны хооронд бай­гуулах ерөнхий хэлэлцээрийн төс­лийг зарчмын хувьд дэмжиж УИХ-ын холбогдох байнгын хороотой зөвшилцөхөөр Засгийн газраас тогтож ийнхүү хэлэлцүүлэхээр оруулж ирснийг Сангийн сайд С.Баярцогт танилцуулсан юм. Уг 500 сая ам.долларын хөнгөлөттэй зээлийн 200 саяыг хөдөө аж ахуй, 300 саяыг дэд бүтэц, боловсрол, эрүүл мэндийн салбарт хэрэгжүүлж төслийг санхүүжүүлэхээр болжээ. Хэлэлцээр хүчин төгөлдөр болсон өдрөөс хойш хоёр жилийн хугацаанд хүчинтэй, жилийн хоёр хувийн хүүтэй, хүүг өдөр бүрээр тооцох аж.

Хэлэлцүүлгийн үеэр гишүүн Д.Арвин зээлийг зарцуулах зарим жаг­саалтыг өөрчилмөөр байна гэ­сэн юм. Тухайлбал, өнгөрсөн жил эрүүл мэндийн салбарт дорвитой тоног төхөөрөмж орж ирээгүй. Мөн музейн салбарт хөрөнгө зарцуулах шаардлагатай гэж байлаа. Д.Арвин гишүүн “Музейн үзмэр алга боллоо. Бүх үзмэр гудамжинд, контейнерт хадгалагдаж, гадаадад гарч байна. Музейгээ санхүүжүүлэхгүй юм уу” гэсэн юм. Мөн зээлийн хэрэгжилтийг салбаруудад задлах бодлого хэрэгтэй гэж байлаа. Сангийн сайд С.Баярцогтын хариулснаар ерөнхий хэлэлцээрт сал­баруудаар тодорхойлж тусгадаг аж. Энэ удаагийн зээлийг хөдөө аж ахуй, боловсрол, эрүүл мэнд, дэд бүтэц гэсэн дөрвөн салбарт зарцуулахаар болсныг тайлбарлалаа. Харин тусгайлсан хэлэл­цээрээр салбар дотор нарийвчлан за­далж тусгадаг гэлээ.

Хөдөө аж ахуйд өгөх зээлийн эзэмшлийг яаж тогтоохыг О.Чулуунбат гишүүн лавлав. Сангийн сайд С.Баярцогт түүнд “Хөдөө аж ахуйд өгөх зээлийн эзэмшлийг хэрхэхийг Засгийн газрын хуралдаан дээр ярьсан. Хоршоололд хамрагдах малчид өмчлөгч болоод явна. Мах, сүүний үйлдвэрлэлийг түлхүүр хүлээлгэж өгөх нөхцөлөөр барина” гэж байлаа.

Төсвийн байнгын хорооны хуралд оролцсон гишүүд  БНХАУ-ын Засгийн газраас Монгол Улсын Засгийн га­зарт олгох 500 сая ам.долларын хөнгөлөлттэй зээлийг ашиглах тухай Монгол Улсын Сангийн яам, Хятадын Экспорт-Импорт банкны хооронд бай­гуулах ерөнхий хэлэлцээрийн төслийг зөвшилцөхийг дэмжлээ. Уг асуудлыг УИХ-ын Аюулгүй байдал, гадаад бод­логын байнгын хороогоор маргааш хэлэлцэх юм байна.