“Формула нэг”-ийн дэлхийн аварга шалгаруулах тэмцээний 2011 оны нээлтийн гран-приг зохион байгуулагчдын зүгээс цуцалж, улмаар нисгэгчид Австралийн Мелбурн хотоос гараагаа эхлүүлж байсан билээ. Тухайн үед орон нутагт үүсээд байсан нөхцөл байдлаас шалтгаалан баг болон нисгэгчдийн аюулгүй байдлыг хангах үүднээс цуцлах шийдвэрийг гаргаж байсан бол одоо Бахрайны гран-приг энэ жилийн хуваарьт багтаах боломжтой болжээ. Энэ шийдвэрийг Олон улсын автомашины холбооноос удахгүй гаргах бөгөөд одоо гран-при зохион байгуулахад ямар нэгэн асуудал байхгүй ажээ.

Тухайн үед засгийн газраа эсэргүүцсэн хөдөлгөөн гарч, олон хүний амь нас үрэгдсэн жагсаал цуглаан даамжирсны улмаас багууд Бахрайнд тест хийх хугацаа олдоогүй, цаашлаад уралдаан явахад аюулгүй байдлын баталгаа байхгүй гэж үзэн цуцалж байсан юм.

Харин даваа гаригт FIA-ийн ерөнхийлөгч Яан Тодд ВСС-д өгсөн ярилцлагынхаа үеэр “Хэрэв байдал тогтвортой, ямар нэгэн асуудал байхгүй гэж үзвэл бид уралдааныг хийх талаар ярилцах болно” гэжээ.

Хэрэв Олон улсын автомашины холбооны удирдах зөвлөлөөр хэлэлцэж, зөвшөөрвөл аравдугаар сарын 30-нд Бахрайны гран-при болох болтой. Энэ нь Өмнөд Солонгос болон Абу Дабигийн уралдааны хооронд болно гэсэн үг юм. Уг нь энэ хооронд багууд сар гаруй хугацаанд амардаг байжээ. Гэхдээ эцсийн шийдвэр гараагүй байна. Мөн энэ асуудлыг нисгэгчид янз бүрээр хүлээн авч байгаа ажээ. Тэдний зарим нь хэтэрхий мөнгө харсан шийдвэр хэмээн үзэж буй гэнэ.

Бахрайны уралдаан цуцлагдсан цагаас л эхлэн хэзээ нөхөж явагдах талаар яриа гарч ихэлсэн учраас магадлал маш өндөртэй юм.