УИХ-ын Хууль зүйн байнгын хорооны хуралдаан өнөөдөр 10.00 цагаас эхэлж Монгол Улсын 2010 оны төсвийн гүйцэтгэл батлах тухай УИХ-ын тогтоолын төсөл, Засгийн газрын 2010 оны жилийн эцсийн санхүүгийн тайлангийн хоёр дахь хэлэлцүүлгийг хийх юм байна. Мөн Жолоочийн даатгалын тухай хуулийн төсөл болон холбогдох төслүүдийн анхны хэлэлцүүлгийг хийнэ. Эл төслийн хүрээнд жолооны  үнэмлэхтэй 700 мянга гаруй иргэнийг жолоочийн хариуцлагын заавал даатгалд хамруулахаар тусгаад буй юм. Түүнчлэн энэ удаагийн байнгын хорооны хуралдаанаар Төрөөс хилийн боомтын талаар баримтлах бодлого батлах тухай УИХ-ын тогтоолын төслийн анхны хэлэлцүүлгийг хийнэ. 

УИХ-ын Төсвийн байнгын хорооны хуралдаан 14.30 цагт зарлагджээ. Тус хуралдаанаар Монгол Улсын 2010 оны төсвийн гүйцэтгэл батлах тухай УИХ-ын тогтоолын төсөл, Засгийн газрын 2010 оны жилийн эцсийн санхүүгийн тайлангийн хоёр дахь хэлэлцүүлгийг хийнэ.  Түүнчлэн Төрийн болон орон нутгийн өмчийн хөрөнгөөр бараа, ажил, үйлчилгээ худалдан авах тухай хуульд нэмэлт, өөрчлөлт оруулах тухай хуулийн нэгтгэсэн төсөл, Улсын тэмдэгтийн хураамжийн тухай хуульд нэмэлт, өөрчлөлт оруулах тухай хуулийн нэгтгэсэн төслүүдийн эцсийн хэлэлцүүлгийг хийнэ.  Төсвийн тухай, Монгол Улсын нэгдсэн төсвийн тухай хуулийг хүчингүй болсонд тооцох тухай, Төсвийн байгууллагын удирдлага, санхүүжилтийн тухай хуулийг хүчингүй болсонд тооцох тухай, Засгийн газрын тусгай сангийн тухай хуульд өөрчлөлт оруулах тухай, Монгол Улсын Их Хурлын чуулганы хуралдааны дэгийн тухай хуульд өөрчлөлт оруулах тухай, Төрийн аудитын тухай хуульд өөрчлөлт оруулах тухай, Монгол Улсын 2012 оны төсвийн хүрээний мэдэгдэл, 2013-2014 оны төсвийн төсөөллийн төслийн хэлэлцэх эсэх, Төсвийн зарлагын хяналтын дэд хорооны даргыг сонгох тухай асуудлыг авч хэлэлцэхээр төлөвлөжээ.