Жил гаруй хугацаанд АНУ-д аялж буй “Чингис хаан” үзэсгэлэн энэ сарын 2-нд Даллас хотод “буудаллажээ”. XIII зууны үеийн дайчдын хөө хуяг, бамбай дуулга тэргүүтэй үзэсгэлэнгийн үзмэрүүдийг саяхан Төрийн ордны өмнөх Чингис хааны хөшөөний загвараар баяжуулжээ. Даллас хотын “Irving” урлагийн төвийн цахим хуудсанд энэ талаар мэдээлсэн байна. 200 гаруй үзмэртэй үзэсгэлэнд XIII зууны үеийн баатруудын төрх, байлдааны үеийг дүрсэлсэн бичлэг, гар зургийг багтаажээ. Ирэх есдүгээр сар хүртэл үргэлжлэх эл үзэсгэлэнг Колумбийн их сургуулийн Морисс Россаби, Дон Лессем нар зохион байгуулж байгаа  тухай “Өнөөдөр” сонинд мэдээлсэн байна.