УИХ дахь Ардчилсан намын бүлэг өнөөдрийн хуралдаанаараа Монгол Улсын 2010 оны нэгдсэн төсвийн гүйцэтгэл болон Засгийн газрын 2010 оны жилийн эцсийн санхүүгийн тайлан, Монгол Улсын эдийн засаг, нийгмийг 2012 онд хөгжүүлэх үндсэн чиглэл батлах тухай УИХ-ын тогтоолын төсөл, Монгол Улсын 2012 оны төсвийн хүрээний мэдэгдлийг авч хэлэлцээд ажлын хэсэг байгуулжээ. Ажлын хэсэг нь таван хүний бүрэлдэхүүнтэй бөгөөд бүлгээс гаргасан зургаан асуудлын хүрээнд ажиллахаар болсон байна. Тухайлбал,  нэгдүгээрт, нефть боловсруулах үйлдвэр байгуулахад онцгой анхаарлаа хандуулан ажиллах ёстой гэж үзжээ. Засгийн газрын зүгээс Дорнодын Тамсаг, Зүүнбаянд нефть боловсруулах үйлдвэр байгуулах чиглэлээр зохион байгуулалтын ажил хийгээд явж байгаа ч энэ нь удаашралтай байна гэж шүүмжилсэн байна. Хоёрдугаар асуудал нь Оюутолгой, Тавантолгойн ордтой холбоотойгоор байгуулах цахилгаан станцуудыг шийдвэрлэх. Гуравдугаарт Монгол Улсын нутаг дэвсгэр дэх боомтуудын үйл ажиллагааг нэгдсэн удирдлагатай болгох. Үүнийг эрх зүйн зохицуулалтын хүрээнд нь Хилийн боомтын талаар баримтлах бодлогод тусгаж өгөх. Дөрөвт, барилгын материал хийдэг үйлдвэрийг дотооддоо байгуулах. Тавдугаарт, шинэ төмөр зам барих ажилд онцгой ач холбогдол өгөх. Техник эдийн засгийн үндэслэлийг нь батлахаас гадна, шаардлагатай хөрөнгийн эх үүсвэрийг олох. Зургаад нь, 2012 оны нэгдүгээр улирлын хагаст иргэдийн үнэмлэхийг цахимжуулсан байх ёстой гэж үзжээ. УИХ-ын сонгууль булхиа луйваргүй хэр шударга явах вэ гэдэг нь цахим үнэмлэхээс хамаарах учраас энэ асуудлыг Засгийн газар 2012 он дууссаны дараа гэж хойш тавилгүй 2012 оны нэгдүгээр улирлын хагаст шийдвэрлэх ёстой хэмээн бүлгийн гишүүд үзсэн юм байна.

Дээрх мэдээллийг бүлгийн дарга Ч.Сайханбилэг хийж, сэтгүүлчдийн сонирхсон асуултад дараах хариулт өгсөн юм.

-УИХ-ын Сонгуулийн хуулийн төслийн тухай ярилцаж байна гэсэн. Ямар асуудал хэлэлцсэн бэ?

-Сонгуулийн хуулийн төсөл дээр бүлгээ төлөөлж ажлын хэсгийн бүрэлдэхүүнд багтан ажиллаж байгаа гурван гишүүн болох Э.Бат-Үүл, З.Энхболд нарын гишүүдээс гадна миний бие  ажлын хэсэг дээрх Сонгуулийн хуулийн төслийн явцын талаар мэдээлэл хийлээ. Үдээс хойш Н.Энхболд даргаар ахлуулсан Сонгуулийн ажлын хэсэг хуралдана. Энэ хуралдаанд бүлгийн зүгээс хураалгах саналуудынхаа талаар нэгдсэн ойлголцолд хүрлээ. Дашрамд хэлэхэд, Ардчилсан намын бүлэг сонгуулийн холимог тогтолцоо 50:26 гэсэн энэ зарчим дээрээ хатуу байгаа гэдгийг тэмдэглье.

-Дээрх хуулийн хүрээнд арилжааны телевизүүд нь сонгуулийн үеэр хоногт нэг цагаас хэтрэхгүйгээр сонгуулийн сур­талчилгааны нэвтрүүл­гийг төлбөртэй явуулж болно гэж заагаад байгаа. Энэ саналыг таныг гаргасан гэх юм, ямар үндэслэлээр ийм санал гаргаад дэмжлэг хүлээгээд байгаа вэ?

-Миний санал биш, ажлын хэсгийн төвшинд гарсан санал. Сонгууль болох сар илүүгийн  хугацаанд улс орон даяар хэвлэл мэдээлэл сонгуулиар амьсгалаад битүү  улстөрждөг. . Үүнийг цэгцлье гэсэн агуулгаар хандсан. Хуучин эфирийн нэвтрүүлгийн 10 хувь гэж явдаг байсан, тэр нь 2 цаг орчмын хугацаа байдаг. Үүнийг нь 50 хувиар багасгаад явахад нэр дэвшигчдийн хувьд сурталчилгаагаа хийчих бололцоотой гэж үзсэн хэрэг л дээ.  Телевизүүдийн хувьд болгоомжлол байхыг үгүйсгэхгүй. Гэхдээ сонин, хэвлэлд  талбайгаар нь тодорхой хязгаар тавьдаг хэрнээ телевизээр түүнээс давсан байх нь хэр зохистой юм болоо гэдэг үндэслэлээр энэ асуудал яригдсан. Цаашид байнгын хороо, чуулганы нэгдсэн хуралдаанд төслийг хэлэлцэнэ, шийдвэр бүрэн гарчихаагүй байна.