УИХ-аас “Үндэсний үйлдвэрлэлийг дэм­жих, ажлын байр нэмэгдүүлэх талаар авах зарим арга хэмжээний тухай” тогтоолын хүрээнд 300 тэрбум төгрөгийн үнэт цаасыг таван жилийн хугацаатайгаар гаргахаар болсон. Үүний 100 тэр­бумыг ноолуурын салбарыг дэмжих зорил­гоор, 50 тэрбумыг нь ноос тушаалт, худалдан авалтыг нэмэг­дүүлэхэд урамшуулал болгохоор тусга­сан. Харин үлдсэн 150 тэрбумыг нь жижиг, дунд үйлдвэрлэлийг хөгжүүлэхэд нэмэр бол­гох юм. Ноос, ноолуурын салбарт зориулж буй 150 тэрбум төгрөгийг хэрхэн олгохыг тогтоолд тодорхой заасан байгаа. Тухайлбал, ноо­луурын утас болон эцсийн бэлэн бүтээг­дэхүүн үйлдвэрлэгчдэд 100 тэрбум төгрөгийг нь хөнгөлөлттэй зээл хэлбэрээр тараана. Ха­рин ноосны салбарынханд зориулж ол­гох 50 тэрбумыг хонь, тэмээний ноос боловс­руулах үндэсний үйлдвэрлэгчдийг түүхий эдээ худалдаж авсных нь төлөө, дээрх үйлд­вэрүүдэд ноос бэлтгэж тушаасан малчдад урам­шуулал хэлбэрээр олгохоор болсон. Энэ нь үндэсний үйлдвэрлэлээ дэмжих нэг хэлбэр мөн боловч малчдыг хэт эрхлүүлж байна гэсэн байр суурийг илэрхийлэх хүмүүс ч цөөнгүй байгаа юм. Учир нь малчдыг 15 жил татвараас чөлөөлдөг атлаа банкных нь зээлийг төрөөс даах, ажлаа хийснийх нь төлөө урамшуулал олгох, малжуулах хөтөлбөрт хамруулах зэр­гээр хэтэрхий бөөцийлж, хариуцлагагүй болгож байгаад нь татвараа төлөөд явж байгаа нийслэлчүүд унтууцах болсон юм.

300 тэрбум төгрөгийн үнэт цаасны хам­гийн их хар дагуулж буй нь жижиг, дунд үйлдвэрлэлийн салбарт зориулан гар­гах 150 тэрбум төгрөг юм. Жижиг, дунд үйлд­вэр­лэлийг хөгжүүлэхэд зориулж төсөвлөж байгаа хөрөнгө “Дусал” төдий байгаа учир үр дүнд хү­рэхгүй байна гэдэг шүүмжлэл газар авсан ч үнэн хэрэгтээ төсөвлөж буй хөрөнгөндөө бус хуваарилалт нь “шог” байгаагаас үр дүн гарахгүй байгааг албаныхан нь хэлсээр бай­гаа. Тухайлбал, жижиг, дунд үйлдвэрийг дэм­жих зориулалттай гадны зээл тусламжийг Сангийн яам, төрөөс төсөвлөж байгаа хөрөн­гийг Жижиг, дунд үйлдвэрлэлийн газар, Хө­дөлмөр эрхлэлтийг дэмжих сангийн хөрөн­гийг Нийгмийн хам­гаалал хөдөлмөрийн яам хариуцаж байгаа нь зээлийн хуваарилалтад замбараагүй байдал үүсгэдэг аж. Яг л гурван толгойтой лууны үлгэртэй ижилхэн гэсэн үг. 2009-2010 онуудад жижиг, дунд үйлдвэрийг дэмжих зориулалтаар нийт 60.8 тэрбум төгрөгийг улсын төсвөөс хуваарилсан. Мөн Дэлхийн банкны “Хувийн хэвш­лийг хөгжүүлэх“, Японы Засгийн газрын “Бай­галь орчин, жижиг, дунд үйлдвэрлэлийг хөгжүүлэх” зэрэг олон улсын төслийн бай­гуул­лагуудын хэрэгжүүлж буй төслүүд, аймаг орон нутгийн өөрийн хөгжлийн сангаар дамжуулан 55.8 тэрбум төгрөгийн санхүүжилт хийсэн тооцоо бий. Цөөхөн хүн амтай манайх шиг улсын хувьд энэ бол бага мөнгө биш. Харамсалтай нь эдгээр зээл хүрэх ёстой эздэдээ очсон уу гэдэг асуултад Мэргэжлийн хяналтын байгууллагынхан саяхан “Үгүй” гэсэн хариултыг өгсөн байсан. Үүний шалт­гаан нь зээ­лийг арилжааны банкаар дамжуулж байгаад бий. Үүний улмаас зээлийн санхүүжилт барьцаа хөрөнгөтэй томоохон компаниудыг торд­­догоос бус “жижиг, дундчууд”-д хүрэх нь ховор аж. Яг энэ байдлаар дээрх 150 тэр­бум төгрөгийн зээлийг тараавал жижиг, дун­д үйлд­вэрлэгчдийг бус “том”-чуудыг угжих болох нь. Мөн өнгөрсөн хугацаанд гаргасан зээлийн эр­гэн төлөлтөөр энэ жилээс жижиг, дунд үйлд­вэрлэлийг хөгжүүлэх сан тэлж эхэлнэ гэж бай­гаа. Төсөв тэлж эхэлж байгаа үед зээл олгол­тын хамрах хүрээг эздэд нь хүргэх шинэ тогтолцоо хэрэгтэй байгааг сануулах юун.