БНХАУ-ын Гүйян хотноо тавдугаар сарын 28-нд эхэлсэн “China Open” тэмцээн өчигдөр дүнгээ гаргалаа. Орхон аймаг дахь “Олимп” баазад нэг сар орчим хугацаанд хамтарсан бэлтгэл хийснээр өмнөд хөршийг “дайлаар мордсон” ширэн бээлийтнүүд Гавьяат дасгалжуулагч Д.Ганзоригийн удирдлага дор 13-уулаа тулалдаж, найман хүрэл медаль хүртжээ. Баг тамирчдын бүрэлдэхүүнд эрэгтэй 10, эмэгтэй дөрвөн боксчин багтсанаас Монгол Улсын Хөдөлмөрийн баатар, Гавьяат тамирчин П.Сэрдамба /52 кг/, ОУХМ Э.Идэрхүү /56 кг/, З.Энхзориг /60 кг/, Ж.Отгонжаргал /69 кг/, Т.Чулуунтөмөр /75 кг/, Х.Мандахбаяр /-91 кг/, Д.Идэрбат /+91 кг/, Б.Ундрам /эмэгтэй, 75 кг/ нар хүрэл медаль хүртэж, шагналын тавцанд гарсан байна.

Дашрамд дуулгахад, энэ сарын 17-27-нд Иорданы нийслэл Амман хотноо болох байсан 2011 оны боксын насанд хүрэгчдийн Азийн аварга шалгаруулах тэмцээний тов хойшилж, наймдугаар сарын 3-13-нд БНСУ-ын Инчеон хотноо болох болсон юм. Тиймээс Монголын ширэн бээлийтнүүд Бээжин хотноо олон улсын тамирчидтай 14 хоног хамтарсан бэлтгэл хийгээд нутагтаа ирмэгц дахин “Олимп” баазыг зорих болсон байна.

“China Open” тэмцээнд оролцсон Монголын баг тамирчид:

Эрэгтэй:

49 кг: Г.Ариунболд
52 кг: П.Сэрдамба
56 кг: Э.Идэрхүү
60 кг: З.Энхзориг
64 кг: У.Мөнх-Эрдэнэ
69 кг: Ж.Отгонжаргал
75 кг: Т.Чулуунтөмөр
81 кг: С.Эрдэнэбаяр
-91 кг: Х.Мандахбаяр
+91 кг: Д.Идэрбат

Эмэгтэй:

51 кг: н.Нандинцэцэг
60 кг: н.Цэрэнчимэд
75 кг: Б.Ундрам