“Туурайн төвөргөөн” орчин үеийн болон уламжлалт урлагийн олон улсын хөгжмийн наадмыг энэ жил 13 дахь жилдээ зохион байгуулах гэж байна. Туурайн төвөргөөн наадамд оролцогч уран бүтээлчид Монголын үзэсгэлэнт газруудаар аялахын сацуу өөрсдийн уран бүтээлийн тоглолтоо гадаа байгальд толилуулдаг.   Монголын Шинэ Хөгжмийн Ассоциацаас жил бүр уг наадмыг амжилттай зохион байгуулж ирсэн билээ. “Туурайн Төвөргөөн” наадмын талаар олон улсын хэвлэл мэдээллээр “Энэхүү наадам бол дэлхийн хамгийн итгэмээргүй гайхалтай аялан тоглолт юм” хэмээн алдартай ГЕО сэтгүүлд, мөн АРТЕ телевизээр “Хамгийн гайхамшигт соёлын арга хэмжээ” хэмээн тодорхойлжээ. 

Туурайн Төвөргөөн наадам нь энэ сарын 13-27-нд Улаанбаатар болон Элсэнтасархай, Хархорум, Дорноговь аймгийн үзэсгэлэнт газруудад болох юм.

Нээлтийн тоглолт энэ сарын 13-нд 16:00 цагаас Монголын Үндэсний Музейн гадна талбайд болно. Харин 14-нөөс эхлэн 24-нийг хүртэл Элсэнтасархай, Өвөрхангай, Дорноговь аймгийн үзэсгэлэнт газруудаар аялан тоглох юм. Хаалтын тоглолт энэ сарын 25-нд Улсын Филармонийн концертийн их танхимд болох аж.