“Боловсрол” суваг телевиз, “Hero entertainment” студи, “Modern nomads” сүлжээ ресторан хамтран явуулж буй ард түмний санал асуулгаар дэлгэцийн шинэ бүтээл туурвих “Кино код” шоу нэвтрүүлэг өнгөрсөн долоо хоногт киноныхоо  сэдэв сонгох санал асуулгаа явуулсан билээ. Тус санал асуулгын шууд нэвтрүүлгээр шилийн сайн эрсийн амьдралыг харуулсан бүтээл олонхийн санал авсан юм. 

Олон нийтийн санал асуулга, оролцоотойгоор ямар кино бүтээх, хэнээр кино зохиолоо бичүүлэх, киноны хөгжмийг хэн зохиох, дууг нь хэн дуулах, бүр ямар жүжигчид тоглуулахыг тодруулан үзэгчид, оролцогчид хамтдаа дуртай киногоо бүтээх энэхүү шоу нэвтрүүлгийн дараагийн зочид кино зохиолчид байх нь ээ.

Кино код нэвтрүүлэг гарч эхэлсэн цагаас өөрсдийгөө сорин төрөл жанр, сэдвийг нь  хүлээн суусан зохиолчид болон хувь уран бүтээлчдэд тус нэвтрүүлгийн зүгээс урилга илгээжээ. Ард түмний дундаас “Кино код”-д өөрийн бүтээлээ сорихыг хүссэн арав гаруй үзэгч болон нэвтрүүлгийн зүгээс Ардын уран зохиолч, төрийн шагналт, яруу найрагч, зохиолч Б.Лхагвасүрэн, Соёлын гавьяат зүтгэлтэн, сэтгүүлч, яруу найрагч Ш.Гүрбазар, яруу найрагч, зохиолч Б.Батрэгзэдмаа, , найруулагч Ц.Ганбат, Ч.Мөнхзул нарт урилга хүргүүлжээ. ”Боловсрол” суваг телевизийн “Кино код” нэвтрүүлгийн өнөөдөр оройн дугаарын зочноор үзэгчдийн дундаас кино зохиолоороо оролцож байгаа эрхмүүд оролцох ба тэд өөрийн зохиолын синопсис буюу кино зохиолын төлөвлөгөөг хэрхэн боловсруулах талаар уг төслийн найруулагч Б.Баатар, найруулагч Р.Батсайхан нарт танилцуулах юм байна.