Мөрдөн байцаагчид “Новая газета” сонины сэтгүүлч эмэгтэй Анна Политковскаяг  2006 онд хөнөөсөн хэргийн гүйцэтгэгч гэж үздэг Рустам Махмудовыг Чеченьд барьжээ.

Тавдугаар сарын 31-ний өглөө Махмудовыг эцэг эхийнх нь гэрээс баривчилсан тухай “Эхо Москвы” радио станцад  Махмудовын ах Жабраилын сонирхлыг төлөөлдөг өмгөөлөгч Мурад Мусаев мэдэгдсэн байна. Махмудовыг Холбооны аюул­гүйн албаны төв аппаратынхан болон Ачхой-Мартановын районы Дотоод хэргийн яамны салбарынхан тусгай ажиллагаа явуулан баривчилжээ.

Оросын Мөрдөн байцаах хороо одоогоор Махмудовыг баривчилсан талаар ямар нэгэн тайлбар хийгээгүй байна. Гэхдээ Хойд Кавказын хол­боо­ны тойргийн хууль хяналтын байгууллага дахь эх сурвалж Ачхой-Мартановын районд Политковскаяг хөнөөсөн гэх алуурчинг баривчилсан гэдгийг  “Интерфакс” агентлагт дамжуулан баталсан байна. Тусгай ажиллагаа Чеченийн хууль хяналтын байгууллагуудын хүчний хүчтэй дэмжлэгтэй хийгдсэн гэдгийг тэрээр онцолжээ.

“Тусгай албаныхан хэсэг хуга­цаанд сэжигтний утсыг сонсч бай­сан бөгөөд түүний амьдаар нь ба­рина гэдэгт итгэлттэй болсон үед уг баривчилгааг хийсэн” гэж эх сурвалж агентлагт ярьсан байна. Ойрын үед түүнийг Москвад авчран байцаах гэнэ.
“Рустам Махмудовыг барьсан нь энэ хэргийг илрүүлэх мөрдөн байцаалтыг урагшлуулахгүй. Ал­лагын захиалагчдыг олоогүй нөх­цөлд энэ гэмт хэрэг илрэхгүй гэж бид нэг биш удаа мэдэгдэж байсан” гэж Политковскаягийн хүүхдүүдийн өмгөөлөгч Анна Ставицкая мэдэгдлээ.

Энэ хэргийн анхны шүүх ажил­лагаанд сэжигтнээр ах дүү Жабраил ба Ибрагим оролцож байхад Рустам Махмудовын нэр нэг биш удаа яриг­даж байсныг тэрээр онцлов. “Түү­нийг энэ хэрэгт холбоотой эс­вэл хамаагүй гэх дүгнэлтийг шүүх гаргана. Хэрэгтнүүдийн суу­далд сэтгүүлч эмэгтэйн аллагыг захиалагчид суугаасай” хэмээн хохирогчдын өмгөөлөгч хэлжээ.

Чеченийн сурвалжлагуудаараа олон улсад алдартай болсон «Новоя газета» сонины тоймч Анна Политковскаяг 2006 оны арав­дугаар сарын 7-нд Москвагийн Лес­ная гудамжин дахь байрных нь орцонд буудан амийг нь хөнөөсөн. Аллагын хэргээр ах дүү Ибрагим ба Жабраил Махмудов, Дотоод хэргийн яамны ажилтан асан Сергей Хажикурбанов нарыг шүүсэн юм. Москвагийн тойргийн цэргийн шүүх 2009 оны хоёрдугаар сард тэднийг хэрэгт хамааралгүй гэсэн шийдвэр гаргажээ. Мөн энэ хэрэгт өөр зүйл ангиар татагдсан байсан Холбооны аюулгүйн албаны ажилтан Павел Рягузовыг ч хамааралгүй хэмээн цагаатгасан юм.

Гэхдээ Дээд шүүх тэднийг зөвт­гөсөн шийдвэрийг цуцлан Ерөн­хий прокурорт дахин нэмэлт мөрдөн байцаалт явуулахаар хэр­гийг бу­цаа­сан. Махмудовынхан, Хажи­кур­банов ба Рягузовын хэргүүдийг  Рустам Махмудовын болон мөр­дөн байцаалтаар тогтоогдоогүй захиа­лагчдынх нь хэргүүдтэй  нэгтгэн шал­гах ёстой гэж байгаа юм. До­тоод хэргийн яамны эрүүгийн хэр­гийн газрын тэргүүн  Искандар Галимов 2010 оны нэгдүгээр сард шүүхээр зөвтгөгдсөн хүмүүсийн гэм буруутайг нь нотолсон баримт хууль хяналтынханд байгаа гэсэн юм. Энэ жилийн гуравдугаар сард Оросын Мөрдөн байцаах хорооны тэргүүн Александр Бастрыкин Политковскаягийн хэргийн мөрдөн байцаалт шүүхэд шууд баримт болохоор баталгааг авч чадахгүй байх гээд “дагавар баримт нотолгооны хэмжээг нэмэгдүүлэх болно” гэж байсан юм. Өнгөрч буй тавдугаар сарын эхээр уг хэргийн мөрдөн байцаалтыг есдүгээр сарын 7 хүртэл сунгаад байсан юм.