АНУ-ын  Засаг захиргааны дээд албан тушаалтнууд, цэргийнхэн болон сэтгүүлчдийн Google и-мэйлийн хувийн мэдээлэлд нэвтэрч, тагнах ажиллагаа явуулсан гэж буруутгагдаад буй Хятадын эрх баригчид үүнийг эрс үгүйсгэсэн байна.  Хятадын гадаад хэрийн сайдын хэвлэлийн төлөөлөгч “Хятад улсыг кибер халдлагад буруутгаж байгааг огт хүлээн зөвшөөрөхгүй” хэмээн мэдэгджээ.

“Google” хэдийгээр Хятадын эрх баригчдыг кибер халдлагад шууд буруутгаагүй боловч Хятадын Жинань мужаас хакер бүлэг Google и-мэйлийн мэдээллийн санд хууль бусаар нэвтэрсэн гэж үзэж байгаа юм. Азийн бусад орнуудад ажиллаж, амьдарч буй Хятадын улс төрийн зүтгэлтнүүд, дээд албан тушаалын хүмүүс ч мөн иймэрхүү кибер халдлагын золиос болж байгаа тухай “Google” мэдэгджээ. “Google”-ийн мэдээлж буйгаар  Хятадын хакер бүлэг хэрэглэгчийн нууц үгийг ашиглан и-мэйлд нэвтэрдэг байна. Цагаан ордон энэ хэргийг мөрдөн шалгаж байгаа боловч Засгийн газрын и-мэйлд хакерууд нэвтэрсэн гэдэгт эргэлзэж байгаа юм байна.