АИХ-ын тэргүүлэгчдийн дарга, МАХН-ын ерөнхий нарийн бичгийн даргын албан тушаалыг хашиж явсан нам улс төрийн нэрт зүтгэлтэн Жамбын Батмөнх агсны улс оронд оруулсан үнэтэй хувь нэмрийг намын гишүүд болон нэгэн үе хамт мөр зэрэгцэн ажиллаж байсан нөхдүүд нь эргэн дурсах уулзалтыг МУИС-иас санаачлан зохион байгууллаа. Түүнийг  дурсах уулзалтад түүний гэргий Даариймаа, төрсөн эгч Ж.Болд нараас гадна нэгэн үе мөр зэрэгцэн алба хашиж явсан нөхөд нь түүний улс орны хөгжилд оруулсан хувь нэмрийг нь хүндэтгэн дурслаа. 1989 онд Улс төрийн товчоог огцруулах асуудалд ул суурьтай хандан бие даан хамгийн зөв шийдвэр гаргаснаар тухайн үед төр эргэхэд цус урсгахгүйгээр улс төрийн тэмцлийг зогсоож байсныг мартах учиргүй хэмээн хуралд оролцогсод үзэж байв.

Хүндэтгэлийн хуралд төр нийгмийн зүтгэлтэн Жамбын Батмөнхийн Монгол Улсын эдийн засгийн боловсрол, техникийн боловсрол, удирдахуйн ухааны хөгжил, улс төрийн амьдралд оруулсан хувь нэмрийн талаар дэлгэрэнгүй илтгэлүүдийг тухайн үед хамт алба хашиж явсан Намын төв хорооны үзэл суртлын хэлтсийн даргыг хашиж явсан Д.Балхаажав, ахмад дипломатч н.Мархааж зэрэг төр нийгмийн ахмад зүтгэлтнүүд хэлэлцэн, ирээдүйн залуу боловсон хүчнүүд болох МУИС-ийн оюутнуудад үнэтэй зөвлөмж, сургаалиудыг захиж хэллээ.Харин түүнийг МУИС-ийн ректорын албыг 1976 оноос 6 жил хаших хугацаандаа шинэ анги танхим нээж улс оронд хэрэгцээтэй боловсон хүчнийг бэлтгээд зогсохгүй өөрөө ч эх орондоо бэлтгэгдэж улс төрийн өндөрлөгт хүрсэн анхны албан тушаалтан байсныг МУИС-ийн удирдлагууд энэ үеэр онцлон хэлж байсан юм. Уг хүндэтгэлийн хуралд оролцогсод цаашид “Батмөнх судлалын сан” байгуулан ажиллахыг тус сургуулийнханд санал болголоо.

Д.Долгор