Монголын хүүхдийн ордны баруун талд “Маамуу нааш ир” дуунд зориулсан хөшөө сүндэрлэж, нийслэлчүүдийн харааг булааж эхэллээ. “Маамуу нааш ир манайд хоёулаа тоглоё” хэмээн хүүхэд бүхэн хэлд орсон даруйдаа дуулж эхэлдэг энэ дуу эдүгээ 55 нас хүрч буй бөгөөд хөшөөний нээлтийн ажиллагаа өнөөдөр боллоо. Хөшөөний нээлтэд Ардын жүжигчин, хөдөлмөрийн баатар, төрийн шагналт хөгжмийн зохиолч Д.Лувсаншарав, Монгол Улсын Шадар сайд М.Энхболд, хүүхдийн дууч хэмээн олонд алдаршсан Монгол Улсын Гавьяат жүжигчин В.Долгор, “Харанга” хамтлагийн хөгжимчин Ц.Энхманлай нар оролцлоо.

Хүүхдийн дууны шүлгийн нэрт мастер Ч.Лхамсүрэн 1956 онд “Маамуу нааш ир” дууны шүлгийг бичиж, улмаар хөгжмийн зохиолч Д.Лувсаншаравт өгч ая дан оруулахыг хүссэнээр энэхүү дуу “төржээ”. Тухайн үед Ардын жүжигчин,  хөдөлмөрийн баатар, төрийн шагналт хөгжмийн зохиолч Д.Лувсаншарав ОХУ-д сурч байсан бөгөөд зургаан настай охиныхоо амандаа аяласан аялгуунаас санаа авснаар энэхүү дууны ая “төрсөн” түүхтэй аж. Харин энэ дууг хөшөөнд мөнхлөх санаачлагыг Нийслэлийн иргэдийн төлөөлөгчдийн хурлын тэргүүлэгчид гаргаж, улмаар компаниуд санаачлагыг дэмжиж ажилласнаар хөшөөг Монголын хүүхдийн ордны баруун талд сүндэрлүүлжээ. Хөшөөний загварыг уран барималч Б.Эрдэнэбат гаргаж, бие даасан уран бүтээлчид хамтран бүтээсэн юм байна.

Хүүхэд бүрийн "амталж" өссөн "Маамуу нааш ир" дуу ийнхүү "Халуун элгэн нутаг"-ийн дараа хөшөөнд мөнхөрсөн хоёр дахь дуу болж байна.