Санкт-Петербургийн Улсын Их Сургууль төгсөгчдийн холбооны ерөнхийлөгчөөр УИХ-ын гишүүн Ц.Нямдорж сонгогдов.

Оросын Холбооны улсын  хамгийн анхны их сургууль болох Санкт-Петербургийн Улсын Их сургуулийн үе үеийн монгол төгсөгчид 2015 оны дөрөвдүгээр сарын 2-нд цугларч төрөлх сургуультайгаа байнгын хэлхээ холбоо тогтоон бүтээлч хамтын ажиллагааг өрнүүлж эрдэм боловсрол, шинжлэх ухааны чадавхи, боломжийг нь улс орныхоо хөгжилд үр дүнтэй ашиглах, хоёр орны уламжлалт найрамдал, хамтын ажиллагаанд шинэ хувь нэмэр оруулах зорилгоор төгсөгчдийн холбоо байгууллаа.

Бүр 1930-аад онд Бямбын Ринчен, Цэндийн Дамдинсүрэн нар Ленинградын Дорно дахины хүрээлэнд судалгаа шинжилгээний ажил хийж байсан бол А.А.Ждановын нэрэмжит болсон Ленинградын Улсын их сургуульд 1950-60-аад оноос эхлэн эдийн засаг, геологи, физик, газар зүй, сэтгүүл зүй, 1970-аад оноос дорно дахины судлал, түүх, философи, хууль эрх зүйн чиглэлээр нийтдээ 100 гаруй монголчууд суралцан төгсгөжээ. Энэ нь Зөвлөлтийн бусад их, дээд сургуулиудтай харьцуулахад тооны хувьд тийм ч олон биш, тэд өөрсдийгөө алдарт Нева мөрний эрэг дээрх Орос, Зөвлөлтийн төдийгүй  дэлхийн түүх, соёл,  шинжлэх ухааны төв болсон энэ хотод амьдарч, хамгийн шилдэг их сургуульд боловсрол эзэмшсэн гэдгээрээ цаг үргэлж бахархаж явдагаа дурсан ярьж байлаа. Одоогоор тэнд дөрвөн монгол оюутан болон дөрвөн магистр, докторант суралцаж байгаа ажээ.

Үүсгэн байгуулах хурлаар холбооны дүрмийг баталж холбооны Ерөнхийлөгчөөр УИХ-ын гишүүн Ц.Нямдорж, дэд ерөнхийлөгчөөр МУИС-ийн Олон улсын харилцаа, нийгмийн удирдлагын сургуулийн багш, доктор, профессор Н.Алтанцэцэг, мөн удирдах зөвлөлийн гишүүнээр УИХ-ын гишүүн С.Одонтуяа, УИХ-ын гишүүн Л.Энх-Амгалан, УИХ-ын гишүүн асан Т.Очирхүү, “Урлах эрдэм” дээд сургуулийн захирал Г.Тунгалаг, мөн Б.Амарсайхан, Д.Ариунболд, Д.Цэрэнжав нарыг сонгов. 

Тус холбоо юуны өмнө Санкт-Петербургийн Улсын их сургуулийн талаар шинэ залуу үеийнхэнд таниулж мэдүүлэх, монгол оюутны тоог нэмэгдүүлэх болон хамтын ажиллагааны шинэлэг арга хэлбэрүүдийг эрж хайн хэрэгжүүлэхээр төлөвлөж байна.

1724 онд байгуулагдаж ноднин 290 жилийн ойгоо тэмдэглэсэн  Санкт-Петербургийн Улсын Их сургуулийн эрдэмтэн багш, төгсөгчдийн жагсаалтанд суут эрдэмтэн Д.Менделеев, К.Тимирязев, Нобелийн шагналт И.Павлов, Л.Ландау, А.Прохоров, В.Леонтьев, Оросын эзэнт улс,  ЗХУ-ын засаг, төрийн тэргүүн П.Столыпин, В.Ленин, ОХУ-ын Ерөнхийлөгч Д.Медведев,  В.Путин, зохиолч И.Тургенев, Б.Стругацкий, яруу найрагч А.Блок, зураач Н.Рерих, шатрын дэлхийн аварга Б.Спасский, А.Карпов нарыг дурдаж болох юм. 

Д.ЦЭРЭН