Яв ягаан өнгөтэй нуур энэ дэлхийд байдаг гэвэл та итгэх үү. Хиллер нэртэй, тод ягаан өнгийн устай нэгэн учир битүүлэг нуур Австралийн баруун өмнө зүгт дундад аралд байдаг байна.

Энэхүү гайхамшигтай нуурын ус яагаад ягаан өнгөтэй байдаг шалтгааныг одоо болтол тайлаагүй л байна.

Хамгийн анх нуурыг Британийн иргэн, ахмад Мэтью Флиндерс Австралийн энэ нутгийг судлах үеэрээ 1802 онд нээсэн гэж үздэг байна. Ахмад дунд арлыг бүхэлд нь харахын тулд хамгийн өндөр уулын орой дээр гартал тод ягаан өнгийн нуур тогтсон байхыг харсан гэдэг.

Нуур гүехэн устай, урт нь 600 орчим, өргөн нь 250 метр. Улирлаас хамааран усны өнгө илүү хурц ягаанаас хар бараан, хүрэн улаан, шүрэн өнгөтэй болон нэлээд өөрчлөгддөг байна. Хиллер аралд сэлж болох бөгөөд ямар ч аюулгүй.

Нуурын ус маш давсархаг, давсны агууламж нь Австралийн эргийн далайн усны давсны хэмжээнээс хэд дахин их байдаг. Тиймээс нутгийн  иргэд ХХ зууны эхээр эндээс хэсэг хугацаанд давс олборлож байжээ.

Дэлхийд ийм өнгөтэй хэдхэн нуур байдаг ч эдгээр нуур ягаан өнгөтэй байдаг шалтгааныг эрдэмтэд тогтоож чадсан байдаг байна. Давст усны Дуналиелла гэдэг маш өчүүхэн намгийн нэг онцгой төрөл үүний шалтгаан болж таарчээ.

Харин чулуурхаг, тэгшхэн ёроолтой Хиллер нууранд юу нөлөөлсөн байж болох вэ?

Онцгой төрлийн бактериуд юм уу, бичил биетүүд усанд өнгө оруулдаг байх гэсэн санаа дэвшүүлж байсан ч чухамхүү ямар гэдгийг эрдэмтэд тогтоож дөнгөхгүй л байгаа гэнэ.

Нуурын усыг ямар нэг саванд хийснээс хойш хэдэн өдрийн дараа ч усны өнгө өөрчлөгддөггүй байна. Энэ нь эрдэмтдийн анхаарлыг маш их татдаг.

Энэ нуурын тухай хэвлэл мэдээллээр мэдээлсний дараа зорин ирэх жуулчдын тоо эрс өсчээ. Австралийн энэ нутаг харьцангуй зэлүүд, энд усан замын дэд бүтэц ч төдийлэн хөгжөөгүй учир жуулчид зөвхөн онгоцоор л очдог байна.

Бэлтгэсэн: Н.ЦЭНДСҮРЭН

Эх сурвалж: "NEWS WEEK" сонин