Сонгуульд ухуулагч сайн дураар ажиллана

Хуучирсан мэдээ: 2011.05.31-нд нийтлэгдсэн

Сонгуульд ухуулагч сайн дураар ажиллана

УИХ-ын Төрийн байгуулалтын байнгын хорооны хуралдаанаар өнөөдөр Монгол Улсын их хурлын сонгуулийн тухай хуулийн төслийн шинэчилсэн найруулгын төслийг авч хэлэлцлээ. Ингэхдээ уг хуулийн төслийг боловсруулах үүрэг бүхий УИХ-ын Төрийн байгуулалтын байнгын хорооноос байгуулагдсан ажлын хэсгээс оруулж ирсэн зарчмын зөрүүтэй саналуудыг авч хэлэлцсэн юм. Төсөлд сонгуулийн сунгаа эхлэхэд нэр дэвшигчийн шадар туслах цалинтай ажиллах бол ухуулагчийг сайн дураар зүтгүүлэхээр оруулж ирсэн байлаа. Ингэхдээ ухуулагчид мөнгө, эд зүйл, материаллаг зүйл өгөхийг хориглоно хэмээн хатуу заалт оруулж өгсөн байв. Хэлэлцүүлгийн шатанд УИХ-ын гишүүн Д.Лүндээжанцан “Орон нутагт нэр дэвшиж байгаа нэр дэвшигчийн хувьд ухуулагчийг ажиллуулахын тулд наад зах нь мотоциклоо хөдөлгөх бнезин авч  өгөх шаардлагатай болно. Ийм тохиолдолд Сонгуулийн хуулиар хууль зөрчсөн гэж үзэх болж байна. Амьдрал баян үүнээс олон жишээ гарч ирэх учраас энэ асуудлыг нэлээн сайн нягтлах ёстой” гэсэн юм. Харин УИХ-ын гишүүн Д.Одхүү нэр дэвшигчийн шадар туслах цалинтай ажиллах байтлаа ухуулагчийг цалингүй “махийлгана” гэдэг нь шударга бус. Тэрэндээ тулбал сонгуулийн хамаг булхай луйвар, мөнгө төгрөг өгч авалцдаг хүн чинь шадар туслах. Ухуулагчийн ажлыг ажилгүй амьдралаа яая даа гэж явдаг хүмүүс л хийдэг. Тийм хүмүүст хөдөлмөрийн хөлсний доод хэмжээгээр цалинжуулах ч юм уу, эс бөгөөс 100 мянган төгрөг өгөөд нэг сар сайн ажиллаад өгөөрэй гэж гуйж болно. Хэрвээ энэ заалтыг ийм байдлаар нь байнгын хороогоор дэмжүүлнэ гэж байгаа бол бүтэхгүй, наад сонгууль чинь мөнгөний сонгууль болно” гэж эсэргүүцсэн юм.  Уг нь ажлын хэсгийнхэн дээрх хуулийн төслийг хэлэлцэх шатанд мөнгөний сонгууль хийхээс аль болох зайлсхийж, дээрх заалтыг тусгаж өгсөн санаатай аж. Тиймээс шадар туслахыг цалинжуулна гэсэн заалтыг ажлын хэсгийн төвшинд дахин нягтлахаар болж авч үлдэн, харин ухуулагч сайн дураар ажиллана гэсэн заалтыг хэвээр үлдээж, байнгын хорооны гишүүдийн дэмжлэг хүлээсэн юм.

Мөн нэр дэвшигч нь МҮОНРТ-ээс бусад арилжааны телевизээр хоногт 1 цагаас илүүгүйгээр төлбөртэй нэвтрүүлэг цацаж болно гэсэн заалтыг гишүүд дэмжлээ. Харин нэр дэвшигчийн сурталчилгааны самбар байршуулах газар, талбайг тухайн орон нутгийн ИТХ-ын тэргүүлэгчид тухайн оныхоо дөрөвдүгээр сарын 1-нээс өмнө тогтооно гэсэн заалт дээр УИХ-ын гишүүн Д.Одхүү мөн анхаарах асуудал байна гэж үзэж, саналаа илэрхийлэв. Тэрбээр “Намуудаас сонгуульд нэр дэвших эрхмүүд тодроогүй үед ийм ажлыг хийхээр эцэстээ энэ нь тухайн талбай, байршлыг зарж иддэг явдал руу түлхэх болно. Дээрээс нь өөрийнхөө талын хүмүүсийн сурталчилгааг хамгийн чухал хэсэгт нь байршуулаад бусдыг нь зах газар руу анхаарал татахааргүй хүний нүдэнд өртөхөөргүй газар зааж өгвөл яах юм бэ. Өмнөх сонгуулийн хуульд иймэрхүү заалт байсан ч хэрэгжээгүй тийм учраас энэ заалтыг нарийвчлах ёстой” гэв.

Ажлын хэсгийн даргын хэлснээр энэхүү заалтад нэр дэвшигчийн эрх тэгш байдлыг хангах ёстой гэсэн заалт давхар туссан учраас нэгийг нь нөгөөгөөс илүүд үзэх асуудал гарахгүй гэсэн хариулт өгсөн юм. Ингэснээр дээрх заалтыг гишүүд гар өргөн дэмжлээ.

Нийтдээ зарчмын зөрүүтэй есөн саналаар санал хураалгаснаар энэхүү хуулийн төслийн хэлэлцүүлгийг дуусгав.

Г.Дарь 
NewsMN Гар утасны хувилбар Татах
NEWS.mn

Мэдээллийн эх сурвалж