УИХ-ын Эдийн засгийн байнгын хорооны хуралдаан 09.30 цагт зарлагджээ. Түүгээр Засгийн газрын үнэт цаас гаргахыг зөвшөөрөх тухай УИХ-ын тогтоолын төслийн эцсийн хэлэлцүүлгийг хийх юм. Засгийн газраас уг тогтоолын төслийг мэдүүлэхдээ ноос, ноолуурын салбарыг дэмжих хүрээнд 110 тэрбум төгрөгийн бонд гаргахаар оруулж ирсэн ч УИХ-ын Эдийн засгийн байнгын хорооноос байгуулагдсан ажлын хэсгийн хүрээнд төслийг боловсруулах шатанд 300 тэрбум төгрөгт хүргэсэн юм. Ингэснээр үндэсний үйлдвэртээ нэг кг ноос тушаасан малчинд 2000 төгрөгийн урамшуулал олгохоор заагаад байна.

Мөн тус байнгын хорооны хуралдаанаар Ашигт малтмалын хайгуулын тусгай зөвшөөрөл шинээр олгохыг хориглох тухай хуульд өөрчлөлт оруулах тухай хуулийн төслийн эцсийн хэлэлцүүлгийг хийнэ. Монгол Улсын эдийн засаг, нийгмийг 2010 онд хөгжүүлэх үндсэн чиглэлийн хэрэгжилт, Монгол Улсын эдийн засаг, нийгмийг 2012 онд хөгжүүлэх үндсэн чиглэл батлах тухай УИХ-ын тогтоолын төслийн хэлэлцэх эсэхийг шийдвэрлэнэ.

УИХ-ын Аюулгүй байдал, гадаад бодлогын байнгын хорооны хуралдаан мөн 09.30 цагт товлогджээ. Түүгээр "Хөлөг онгоцны шатахууны савны бохирдлоос учирсан хохирлын төлөө хүлээх иргэний хариуцлагын тухай" 2001 оны конвенци, "Хөлөг онгоцны гадаргууг хамгаалах системд хортой бодис ашиглахыг хянах тухай" 2001 оны конвенци, "Хөлөг онгоцны тэнцвэржүүлэгч ус болон үлдэгдэл тунадасны хяналт ба менежментийн тухай" 2004 оны конвенци"-ийн хуулийн төслийг хэлэлцэнэ. Мөн "Далайн хиймэл дагуулын олон улсын байгууллагын 1976 оны конвенци" болон түүнд нэмэлт, өөрчлөлт оруулсан 1981 оны протокол, "Далайн нэхэмжлэлийн хариуцлагыг хязгаарлах тухай" 1976 оны конвенци болон түүнд нэмэлт, өөрчлөлт оруулсан 1996 оны протоколд тус тус нэгдэн орох тухай хуулийн төслийг хэлэлцэнэ. Азид хамтран ажиллах, итгэлцлийг бэхжүүлэх бага хурлын нарийн бичгийн дарга нарын газар, түүний ажилтан, гишүүн улсуудын төлөөлөгчдийн эрх ямба, дархан эрхийн тухай конвенцийг зөвшилцөнө.