Монголын Үндэсний сагсан бөмбөгийн холбооны “Супер лиг”-ийн плэй-оффт өрсөлдөх найман баг өчигдөр бүрэн тодорлоо. II тойргийн сүүлийн тоглолтод хожигдол хүлээсэн “Сентоза арслангууд” тэмцээнийг цааш үргэлжлүүлж чадсангүй. Тэдний хувьд өчигдөр “СБЛ Хасын Хүлэгүүд” багийг хожсон тохиолдолд наймдугаар байрт бичигдэх байсан ч 69:82 онооны харьцаагаар ялагдсан юм. Ийнхүү хүснэгтийн наймдугаар байрт бичигдэж буй “Хан талстын ирвэсүүд” плэй-оффт шалгарч “Сентоза арслангууд” сүүлийн боломжоо ашиглаж чадалгүй лигийг өндөрлүүллээ.

ПЛЭЙ-ОФФТ ӨРСӨЛДӨХ НАЙМАН БАГ БҮРЭН ТОДОРЛОО

2014-2015 оны Үндэсний супер лигийн нээлт өнгөрөгч арваннэгдүгээр сарын 19-ний өдөр Спортын төв ордонд болж байсан билээ. Анх удаагаа 11 баг өрсөлдсөнөөс хоёр тойргийн нийлбэр дүнгээр найман баг плэй-оффт өрсөлдөх эрхийг авлаа.

Плэй-оффт “СБЛ Хасын хүлгүүд”, “Увс Эрдэнэдрийлинг ригс”, “Дорнод Танан гарьд”, “Дундговь Альянс Тех харцага”, “Мон-Алтиус Мадимос шонхорууд”, “Их өргөө аравтууд” болон “Төв аймаг төв ургац”, “Хан талстын ирвэсүүд” багууд шалгарлаа. Харин “Сентоза арслангууд” ес, “Гэгээн хангай лидер” зургаа, “Хэнтий Чингис Сити” баг дөрвөн хожил авч шилдэг наймын төлөө өрсөлдөх боломжгүй болсон юм.

Даваа гаригийн(III.09) сүүлийн тоглолт “SBL Хасын хүлэгүүд”, “Сентоза арслангууд” багуудын хооронд болсон юм. Энэ тоглолтод хүснэгтийг тэргүүлж буй Хасын хүлгүүдийг арслангууд заавал хожих үүрэгтэй байсан. Учир нь тэдэнд плэй-оффт үлдэж, тоглолтыг цааш үргэлжлүүлэх боломж байсан юм. Харамсалтай нь тоглолт 82:69 онооны харьцаагаар “Хасын хүлэгүүд”-ийн ялалтаар өндөрлөж, арслангууд есдүгээр байрт бичигдсэнээр лигийн тоглолтыг өндөрлүүллээ.

Хэдийгээр плэй-оффт өрсөлдөх найман баг бүрэн тодорсон ч тэдний дөрөв нь маргааш II тойргийн сүүлийн тоглолтоо хийж, байрлалын төлөө өрсөлдөх юм.

Спортын төв ордонд үргэлжлэн явагдаж буй “Супер лиг”-ийн маргаашийн тоглолтын хуваарийг танилцуулья:

III.11 (Лхагва)

16.00 цаг: “Дундговь Альянс Тех харцага” vs “Хэнтий Чингис Сити”

18.00 цаг: “Мон-Алтиус Мадимос шонхорууд” vs “Их өргөө аравтууд”

20.00 цаг: “Дорнод Танан гарьд” vs “Гэгээн хангай лидер”

2014-2015 оны Үндэсний супер лигийн плэй-оффын тоглолтууд ирэх даваа гариг буюу гуравдугаар сарын 16-ны өдөр Спортын төв ордонд эхэлнэ.

Ч.БОЛОР