Нийслэлийн хэмжээнд хийж буй зам засварын ажилтай Мэргэжлийн хяналтын газар, нийслэлийн Авто замын газрын холбогдох албан ту­шаалтнууд танилцлаа.  Энэ үеэр зам засч буй компанийнхан хамгийн тү­рүүнд “Бензин, шатахуун хомсодсон нь засварын ажилд саад учруулж байна. Энэ асуудлыг анхааралдаа авах­гүй бол ажлаа төлөвлөсөн ху­га­цаанд нь дуусгаж чадахгүйд хүр­нэ” гэсэн саналыг хэлж байлаа. Учир нь компаниуд өдөрт хэрэглэх түлш­нийхээ 50 орчим хувийг л авч бай­гаа аж.  Зам засч буй компаниуд  шата­хуун импортлогч компанитай гэрээ байгуулсны үндсэн дээр дизель түлш авдаг. Гэсэн ч нэг удаад 100 хүртэлх мянган төгрөгт шатахуун авч байгаа ажээ. Үүнээс үүдэлтэйгээр за­рим компани үйл ажиллагаагаа тодор­хойгүй хугацаагаар зогсооход хүр­сэн байна. Тухайлбал, Толгойтын баруун салааны 4.1 км замын ажил шатахууны хомсдолоос болж бүрэн зогчээ. Харин “ТЭЦ-3”, “ТЭЦ-4”-ийн урдах зам засварын ажил үүнээс болж удаашраад байгаа ажээ. Мэргэжлийн хяналтын газрын дарга Р.Содхүү “Зам засварын ажлыг дулааны улиралд хийж дуусгах нь чухал. Тиймээс энэ асуудлыг холбогдох хүмүүст нь уламжилна” хэмээсэн юм. Нийслэлийн Авто замын газраас зам засварын ажилтай холбоотойгоор зарим чиглэлийн нийтийн тээврийн хэрэгслийн маршрутыг өөрчилснөө танилцуулж байсан. Тэгвэл үүнийг ч дахин өөрчлөх шаардлага тулгарчээ.

МХЕГ, нийслэлийн Автозамын газрынхан үүнээс гадна Үндсэн хуу­лийн гудамжийг Энгельсийн гудамж­тай холбох гүүрэн гарц,  Ажилчны гу­дамжны 3.5 км автозамын өр­гөт­гөл, шинэчлэлийн ажилтай танилц­сан юм. Гүүрэн гарцын хувьд барил­гын ажил нь 50 орчим хувьтай үргэл­жилж байгаа юм. Харин Ажилчны гудамжны авто замын  өргөтгөлийн аж­лын хувьд хашлага, нөхөөс, хол­боо, цахилгааны болон нөөц сувагч­лалын ажлыг хийж байгаа ажээ.

Зохиогчийн эрх:
"Улс төрийн тойм" сонин