Олон улсын сагсан бөмбөгийн холбоо (FIBA) энэ оны Европын аваргын тэмцээний албан ёсны бөмбөгийг танилцууллаа. Багуудын тоглох бөмбөгт тэмцээн зохион байгуулагч дөрвөн орны  далбаа ба супер баатрын хөрөг зурагджээ.

“Евробаскет-2015” тэмцээн есдүгээр сарын 5-20-ны хооронд Герман, Латви, Хорват, Францад болно. Плей-офф ба шигшээ тоглолт нь Францад болно.

"Бөмбөгийн дизайнд тэмцээний эзэн болох дөрвөн орны далбаа, Евробаскетийн логог ашиглав. Европын аваргын тэмцээн шууд дөрвөн оронд явагдах онцлогийг нь уг бөмбөгт харуулж өглөө.  Бөмбөгийг гайхамшигтай тоглогчдын гарт есдүгээр сард харахыг тэсч ядан хүлээж байна” гэж  FIBA-гийн европ салбарын ерөнхийлөгч Тургай Демирелийн хэлснийг тус байгууллагын албан ёсны сайтад мэдээлжээ.

Ирэх зургадугаар сараас бөмбөг нээлттэй худалдаанд гарч ирнэ.

Бэлтгэсэн Ш.МЯГМАР