Үндэсний статистикийн хорооноос явуулсан судалгаагаар энэ жил нийслэлээс 4500 гаруй өрх хөдөө орон нутагт ажиллаж амьдрахаар зорьжээ. Сүүлийн жилүүдэд байгаль цаг уурын таатай нөхцөл байдлаас шалтгаалан мал сүргийн тоо өссөн төдийгүй Хөдөө аж ахуйн биржийн үйл ажиллагаа жигдэрснээр малчин өрхийн орлого нэмэгдэхэд хүргэсэн байна. Мөн төр засгаас бэлчээрийн усан хангамж, ургамал хамгааллын зөв бодлого явуулсан нь мал маллах сонирхолтой иргэн, өрхийн тоо нэмэгдэхэд нөлөөлсөн байна гэж Хүнс хөдөө аж ахуйн яамнаас үзэж байгаа талаар мэдээллээ.