Нээлтээ хийсэн даруйдаа гайхалтай амжилт олж байсан “Шарталт” киноны шинэ анги Лас Вегасаас Тайландад үргэлжлэх гэнэ. Найруулагч Тодд Филиппс “Шарталт-2” кинонд хуучин уран бүтээлчидтэй хамтран ажилласан байна. Киноны эхний анги гарсан даруйдаа амжилт, шүүмлжлэлийн аль алинг дагуулсан. Америкийн зарим кино театрууд уг киног хэтэрхий илэн далангүй агуулгатай гэж үзэж гаргахаас татгалзаж байсан юм. Гэсэн хэдий ч үзэгчид “Шарталт”-ыг үргэлжлүүлэхийг  уран бүтээлчдээс шаардах болсноос дараагийн ангийг нь бүтээхээр ажилдаа орсон ажээ.

“Алтан бөмбөрцөг” наадмын улаан хивсний ёслолд  уран бүтээлчидтэй хамт “Шарталт-2” кинонд тоглосон жүжигчин сармагчин ирсэн нь гэрэл зурагчдыг хамгийн их баярлуулсан гэнэ.  Капучин хэмээх уг сармагчин Холливудын “ахмад дайчид”-ын нэг ажээ. Капучин сармагчин “Шарталт”-аас гадна Стивен Спилбергийн “Индиана Жонс”, “Болор гавал” зэрэг хорь гаруй кинонд дүр бүтээсэн юм. 

Найруулагч  Тодд "Бид “Шарталт”-ыг үргэлжлүүлэхээр Бангкогийг сонгосон нь Лас Вегасыг сонгосон шалтгаантай адил. Энэ түм түжигнэж, бум бужигнасан газарт л хачирхалтай олон зүйлстэй учирч болно” гэжээ. 

“Алтан бөмбөрцөг” кино наадмаас “Шарталт” инээдмийн киноны төрөлд шилдэг киноны шагнал хүртсэн юм.  “Шарталт-2” кино энэ сарын 26-наас эхлэн Британийн кино театруудаар гарч эхлэх юм байна.