Хөгжимт буюу мюзикл, үлгэр домгийн, уран зөгнөлт, аймшгийн, мелодрам, дайн байлдааны, адал явдалт, түүхэн, инээдмийн гэсэн есөн төрөл өрсөлдсөнөөс нийт саналын 35 хувь буюу 8250 хүний саналаар “түүхэн” киноны төрөл ялжээ. Түүний араас санал асуулгаар  инээдмийн, адал явдалт, аймшгийн төрлүүд удаалжээ. Төслийн эхний шатны киноны төрлийг сонгохоор news.mn, gogo.mn, olloo.mn, zaluu.com, zarmedee.mn сайтууд болон шууд утас 1950,1970, үүрэн сүлжээний операторын тусгай дугаар 155068-аар мессэжээр авсан санал асуулгад 23573 хүн оролцож саналаа өглөө. Эдгээрийн 60 орчим хувь нь Боловсрол суваг телевизээр шууд санал авах нэг цаг хагасын шууд нэвтрүүлгийн үеэр саналаа өгсөн байна.
Ийнхүү төслийн эхний алхам болох хийх киноныхоо төрөл, жанрыг бүх нийтээрээ хамтран гаргаж дуу нэгтэйгээр “түүхэн” кино гэсэн сонголтоор нэгэн сайхан кино бүтээх эхний алхмаа хийцгээлээ. Цаашид сонгогдсон төрлийнхөө хүрээнд ямар сэдвийн дагуу хэн гэдэг зохиолчоор зохиолоо бичүүлэн, хэн, хэн түүхэн дүрүүдийг бүтээх,  хэн хит хөгжим, дуу зохион хэн түүнийг ард түмэнд дуулж хүргэхийг бид бүхэн хамтдаа сонгох дараа дараагийн санал асуулгууд, сонирхолтой нэвтрүүлгүүдийг хүлээх л үлдлээ.