Германы Бундеслигийн 19 дүгээр тойргийн сүүлчийн тоглолтууд өнгөрсөн шөнө явагдаж өнгөрлөө. Энэ хүрээнд хүснэгтийн сүүлийн байранд яваа "Боруссиа Дортмунд" клуб өөрсдийн "Сигнал Идуна" цэнгэлдэх хүрээлэндээ "Аугсбург" клубыг хүлээн авч тоглосон ч 1-0 харьцаатай хожигдол хүлээлээ.

Тоглолтын хувь заяаг шийдсэн цорын ганц гоолыг зочин багийн довтлогч Бобадилья 50 дахь минутад оруулсан юм. "Дортмунд"-ын хувьд 19 тойргийн дараах байдлаар ердөө дөрвөн хожил, дөрвөн тэнцээ, 11 хожигдол хүлээж, энэ улирлын Бундеслигийн хар дарсан зүүд үргэлжилсэн хэвээр үлдсэн юм. Харин хожил байгуулсан "Аугсбург" клуб 33 оноотой болж, хүснэгтийн дөрөвдүгээр байраа хадгалж үлдлээ.

Мөн тоглолт өндөрлөсний дараа "Дортмунд"-ын хамгаалагч Матс Хуммельс болон хаалгач Вайденфеллер нар уурласан фанатуудаа тайтгаруулж, уулзалт хийсэн байна.

Бусад тоглолтын үр дүн:
Кельн 0 : 0 Штутгарт
Падерборн 0 : 3 Гамбург
Хоффенхайм-1899 1 : 2 Вердер
Герта 0 : 1 Байер

Эх сурвалж: www.mminfo.mn