“Дорнод нутаг” клубээс санаачлан “Нар тоссон нутгийнхан дорнодчууд” чуулга уулзалтыг маргааш Гачуурт дахь Монгол шилтгээнд зохион байгуулах гэж байна. Тус чуулга уулзалтад оролцох залууст маргааш 10.00 цагт Драмын эрдмийн театрын өмнөөс өөрийн унаагаар үйлчлэх юм байна. 11.00 цагт тус чуулганыг нээн “Морин хуурын чуулга” тоглон Дорнодын хийдийн лам нар ном уншина. Чуулганы зочдод зориулан хүндэтгэлийн концерт тоглож, Дорнод аймгийн Засаг даргын тамгын газрынхан аймгийнхаа 80 жилийн ойг танилцуулан мэдээлэл хийх ажээ. Харин 14.00 цагт чуулганы салбар хуралдаанууд болох юм байна. Чуулганд оролцож байгаа залууст зориулан элсний волейбол, дартс, шатар зэрэг спортын арга хэмжээнүүдээс гадна “Нисванис”, “Fire”, “Madness” хамтлагууд  ая дуугаа өргөн DJ нарын шоу тоглолт, галын наадам болох аж. Дашрамд сонирхуулахад, хөлбөмбөг сонирхогчдодоо зориулан “Барса”, “МанЮ”-гийн тоглолтыг гаргах гэнэ. Тус чуулганы ерөнхий зохион байгуулагчаар “Дорнод нутаг” клуб, хамтран зохион байгуулагчаар Улаанбаатар хот дахь Дорнод аймгийн нутгийн зөвлөл, Дорнодын оюутан залуучуудын нэгдсэн холбоо ажиллаж байгаа юм.