Тэтгэвэртээ гарсан япон инженерүүд “Фүкүшима” АЦС-ын ослын үр дагаврыг арилгах ажилд оролцон сүүлийн удаа ажилдаа гарахыг хүсч байна. Одоо тэтгэвэртээ сууж байгаа 60-аас дээш насны цөмийн эрчим хүчний болон барилгын 160 ахмад туршлагатай инженер корпус байгуу­лан цунамид нэрвэгдсэн атомын станцын хөргөх системийг сэргээхэд туслах хүсэлтэй байна.

Ослын үр дагавартай тэмцэхэд туслах ахмад ажилтнууд нь хэдэн арван жилийн туршлагатай бөгөөд мөн тэдэнд залуу мэргэжилтнүүдийг цацрагийн хордлогоос хамгаалан өөрс­дийгөө золиос болгох  чин сэтгэ­лийн эрмэлзлэлтэй гэнэ.
Корпус байгуулах санаачлагыг тэт­­гэ­вэрт суугаа 72 настай инженер Ясу­­теру Ямада (Yasuteru Yamada) гар­гажээ. Туршлага багатай залуус өндөр эрсдэлтэй ажил хийж байгаа нь түүний сэтгэлийг зовоосон гэнэ.

“Энэ ажлыг зөвхөн залуу инже­нерүүд хийх ёсгүй. Гэр бүлтэй, ирээ­дүйтэй залуус цацраг идэвхт боди­сын хордлого авах ёсгүй” гэж тэрээр ярьсан байв. Одоо ослын станцад ээдрээтэй хүнд нөхцөлд 1000 гаруй хүн ажиллагч байгаагийн зарим нь захиалгат ажилчид ажээ. Тэд зургаан тогоотой АЦС-т хяналт тогтоон барихаар оролдож байна.

Ахмадуудын төлөвлөгөөг улс­төрчид дэмжиж байна. Ахмадуудыг ажиллуулахаар боллоо гэхэд цараг туяаны хордлогод өртүүлэхгүйн тулд нарийн бэлтгэл хийх болно гэж тэд мэдэгдэж байна. Корпус байгуулагчид өөрсдийг нь амиа золиослогч нисгэгч-камиказе гэж зүйрлэн нэрлэж байгааг эсэргүүцлээ. Гэсэн ч зарим инженерүүд ослыг арилгахын тулд амиа өгсөн ч бэлэн гэж мэдэгдээд байгаа гэнэ.