Албан тасалгааны зориулал­тын тавилга болон гэрэл зургийн аппарат үйлдвэрлэлээрээ дэлхийд өндөр үнэлэгдэж ирсэн японы Ricoh компани өөрийн 10 мянга орчим ажилчдыг халах болсон тухайгаа өчигдөр зарласан байна. Дэлхийн олон оронд салбараа нээж амжсан энэ компанид одоогоор 110 мянган ажилчин ажилладаг ажээ.

Ажилчдаа халах болсон ту­хай энэ мэдээлэл гармагц Ricoh компанийн хувьцааны үнэ долоон хувиар унасан байна. Оффисийн зориулалттай төхөөрөмж болох хуул­барлагч машин зэрэг бүтээг­дэхүүн түлхүү үйлдвэрлэж байсан тус компани ийнхүү цомхотгол хийх болсон шалтгаан нь олон улсын санхүүгийн хямралтай холбоотой гэж Ricoh компанийн удирдлагууд мэдэгджээ.

Компанийн захирал Сиро Кон­до хэлэхдээ, “ Асар том компани бо­лон хөгжсөн учраас дотоод бүтэц, зохион байгуулалтаа өөрчилж шинэч­лэх зайлшгүй шаардлага бай­на. Ингэснээр улам ч хүчирхэг болно” гэсэн байна. Мөн тэрээр ашиг багатай үйлдвэрлэлээс тат­гал­зах талаар сүүлийн үед ан­хаарал тавиагүй байсан алдаагаа засахаас өөр аргагүй боллоо гэжээ. Токиод байрлах Ricoh компанийн төв удирдлага салбарууддаа хийж байгаа энэхүү цомхотголын үр дүнд 733 сая ам.долларын зардлыг хэмнэнэ хэмээн найдаж байгаагаа мэдэгдсэн байна. Мөн цаашдаа ч шаардлагатай цомхотголыг хийхээр төлөвлөж байгаа бөгөөд гурван жилийн дотор ийм аргаар 140 тэрбум иенийн үйл ажиллагааны хэмнэлт гаргаж чадна гэж тооцоолжээ.

Хэдийгээр Ricoh компанийн удирдлага цомхотгол хийх бол­сон гол шалтгааныг дэлхийн сан­хүүгийн хямралтай холбон тайл­барлаж байгаа ч өөр бусад шалтгаан ч бас байгаа гэж шинжээчид хэлж байна. Мэдээж нэг шалтгаан нь өнгөрсөн гуравдугаар сард болсон хүчтэй газар хөдлөлтийн уршиг бөгөөд энэ үеэр тус компанийн хэд хэдэн үйлдвэрийн барилга нурж сүйдэн ихээхэн хохирол учруулсан аж. Мөн сүүлийн үед иенийн ханш байнга өсөж байгаагаас болж тус компанийн экспортын ху­далдаа  ашиг багатай болж ир­сэн нь ч бас нэгэн шалтгаан гэж үзэж байгаа юм. Өнгөрсөн сард Японы ахуйн цахилгаан ба­рааны томоохон үйлдвэрлэгч Pana­sonic фирм өөрийн 17 мянган ажилч­дыг халахаар шийдвэрлэсэн бай­на. Panasonic фирм газар хөд­лөл­тийн үеэр мөн л хохирч, гам­шигт өртсөн үйлдвэрүүд нь одоо л үйл ажиллагаагаа сэргээж байгаа гэсэн мэдээлэл гарч бай­гаа аж. Хэдий тийм боловч бай­галийн гамшиг нүүрлэхээс өм­нө гаргаж байсан хэмжээнд хү­рэхээр бүтээгдэхүүнийг одоо хэр үйлдвэрлэж чадахгүй байгаа юм байна. Мөн ганцхан Ricoh ч биш бусад японы компаниуд ч мөн адил ханшийн хөдөлгөөнөөс болж экспортын зах зээл дээр бусад орны хямд бараануудтай өрсөлдөж чадахгүйд хүрээд байгаа ажээ. Ялангуяа Хятад болон Өмнөд Солонгосын үйлдвэрлэсэн үнэ хямд бараатай өрсөлдөх нь японы фирмүүдийн хувьд улам бүр хүнд болж байгаа гэнэ.

Дэлхийн хэмжээний шилдэг брэндийг гаргадаг японы SONY фирм иенийн ханшны өсөлтөөс болж 3.1 тэрбум ам.долларын алдагдал хүлээсэн гэдгээ өчигдөр зарласан байна. Энэ дүн мэдээг энэ оны гуравдугаар сараар тасалбар болгосон санхүүгийн жилийн тайланг гаргасныхаа дараагаар мэдээлжээ. Гэхдээ энэ оны эцэс гэхэд тус фирмийн орлого эргээд нэмэгдэнэ гэж найдаж байгаа аж.

Зохиогчийн эрх:
"Ардын эрх" сонин