Америкийн  албан тушаалтнуудад эзэлхүүн ихтэй хөдөлгүүр бүхий хүчирхэг автомашин худалдан авахыг хоригложээ. Цагаан ордны аппарат холбооны агентлагийн ажилтнуудад төрийн ажил албанд зөвхөн авсаархан хэмнэлттэй машин хэрэглэж байхыг үүрэг болгосон тушаал тараасан байна.

Барак Обама албан тушаалт­нуудад том оврын автомашин худал­дан авахыг хориглосон байна. Энэ тухай The Detroit News хэвлэлд мэдээл­сэн байна. “Цаашид  хэрэгтэй байсан ч том оврын хүч чадалтай седануудыг ашиглахгүй” гэж ерөн­хий­­­лөгчийн баримтад өгүүлжээ.

Тунхагийн дагуу Нэгдсэн үйл­чил­гээний албаны газар (General Services Administration, GSA) холбооны авто паркт 100 цахилгаан тээврийн хэрэгсэл оруулах төслийг хэрэгжүүлж эхлэв. Машинуудыг Вашингтон, Детройт, Лос-Анджелес, Сан-Диего ба Сан-Франциско хо­туу­дын яам тамгын газруудад хуваа­рилна. Мөн орон нутагт цахилгаан машины засвар, үйлчилгээ явуулах дэд бүтцийг GSA бий болгох гэнэ.

Ерөнхийлөгчийн хөтөлбөрт 2015 оны арванхоёрдугаар сар гэхэд ал­бан тушаалтнуудын унах албаны болон түрээсийн машинууд нь эрчим хүчний хэмнэлттэй хөдөлгүүрээр тоног­логдсон байх ёстой.
Засаг захиргаа орон нутагт био болон цахилгаанаар цэнэглэх түгээ­гүүрийн сүлжээ, үйлчилгээг бий болго­сон байх ёстой гэнэ.  Шинэ заг­ва­рын машинуудыг ашиглах  үр дүнг нэмэгдүүлэхийн тулд энэ тунхаг бичгээр төрийн албанд хэрэглэх ма­шины хэмжээ, машинд тавих нэмэлт төхөөрөмжийн хязгаарлалтыг  зааж өг­сөн байна. “Холбооны агентлагууд зургаан сарын дотор авто паркийнхаа талаар дэлгэрэнгүй мэдээллээ өг­сөн байх ёстой. Энэ санамж бичиг аврах албад, цагдаа болон тусгай алба­ныханд үйлчлэхгүй” гэж баримтад өгүүлжээ.
Тогтсон уламжлалаар Америкийн төрийн албад нь машины парктаа бүрэн хэмжээний Ford Taurus эсвэл Ford Fusion (Европын авсаархан хетчбэкаас, америкийн Fusion– седан 4,84 метрийн урттай,  2,5-3,5 литрийн эзэлхүүнтэй,  175-263 морины хүчтэй хөдөлгүүртэй), Lincoln Town Car, Cadillac STS загварын машинуудыг худалдан авдаг. Одоо тэгэхээр эдгээрийг хибрид эсвэл цахим хөдөлгүүртэй Chevrolet Volt, Nissan Leaf машинуудаар солих болж байна. Обама өөрөө хуягласан Cadillac One лимузин унах бөгөөд үүнийг нь сэтгүүлчид танктай зүйрлэн хэлдэг. Цагаан ордны баримтад төрийн тэргүүн экологийн авто машин хэрэглэх эсэхийг заасангүй.

Обамагийн санамж бичигт нь нефть экспортлогч орнуудын хамаарлыг арилгах, нефтийн бүтээг­дэхүүний хэрэглээг багасгах түүний стратегийн хандлага харагдаж байна. Гуравдугаар сарын сүүлчээр тэрээр ард түмэндээ хандан шатахууны хэрэг­лээг багасгахыг уриалсан юм. Мөн түүнчлэн Цагаан ордны төлөв­лөгөөнд 2017 он гэхэд нефтийн импортыг 30 хувиар бууруулж, шинэ түлшний стандартыг бий болгохоор тусгаад байгаа юм.

Шатахууны салбар дахь ерөн­хий­­лөгчийн шинэчлэл нь Хойд Америкийн зах зээл дэх авто  үйлд­вэр­лэгчдэд түгшүүр төрүүлжэ байна. Энд шатахууны шинэ стан­дар­тын талаар яригдаж байна. Шинэ стандартыг энэ зун ачааны машинуудад, намар нь суудлын авто­­­машинуудад суулгана. “Их гурав” болох GM, Ford, Chrysler  шинэ хэмжигдэхүүнтэй нарийвчлан танилцахын тулд энэ хугацааг сунгаж өгөхийг Засгийн газраас хүсчээ. Машин үйлдвэрлэгчид нэг галлон бензинээр 34,1 милийг туулах (100 км-т 6,9 литр) Конгрессийн нормыг хүлээн зөвшөөрөөд байгаа. Гэхдээ их гурвалын төлөөлөгч “Үүгээр энэ ажил дуусахгүй нор­мыг улам багасгах болно” гэжээ. Америкийн засаг захиргааны эц­сийн зорилт нь 2025 он гэхэд 100 км-т 3,8 литр шатахуун хэрэглэх норм юм. Ингэснээр Засгийн газар 7,7 сая галлон буюу 385 баррель нефть хэмнэнэ гэж Цагаан ордон тооцоолжээ.