Монгол Улсын Ерөнхий сайд С.Батболд яг одоо иргэний нийгмийн байгууллагын төлөөлөгчидтэй уулзаж байна. Уулзалтыг нээж, Ерөнхий сайд С.Батболд үг хэлж хуралдааныг үр дүнтэй явуулахыг зөвлөв. “Бүгдээрээ ярилцвал буруугүй гэдэг. Хамгийн гол нь ийнхүү бүгдээрээ хэлэлцдэг болох тогтолцоог бий болгомоор байна. Төр иргэний нийгмийн хамтын ажиллагааг боловсронгуй болгох ажлын хэсгийнхэнтэй уулзахад ихээхэн дэвшилттэй зүйлс гарсан байна. Засгийн газар, иргэний нийгмийн хамтарсан энэ ажлын хэсгээс хамтын ажиллагаа дараагийн шатандаа гарах шаардлагатай болсныг ойлголоо” хэмээн С.Батболд хэллээ.

Энэхүү уулзалтыг өмнө нь “Иргэний нийгмийн тогтвортой хөгжлийг хангах төрийн бодлого” сэдвээр зохион байгуулж байсан бөгөөд хамгийн сайн санал, санаачилга, шийдэл жирийн ард иргэдийн ухаанаас ундаргатай. Тиймээс иргэдийнхээ санаа бодол, санал санаачилгыг үйл ажиллагаа, шийдвэртээ тусгахыг илүүд үзэж, иргэний нийгмийг төлөвшүүлэхийн төлөө анхаарч ажиллахыг төрийн үүрэг байх ёстой гэдгийг Ерөнхий сайд хэлж байсан юм.

Мөн өнөөдрийн хэлэлцүүлгээр бодлогын эдгээр асуудлын хүрээнд Нээлттэй засгийн тухай тунхгийн төсөл, Төр иргэний нийгмийн хамтын ажиллагааны тогтолцоог боловсронгуй болгох талаар хэлэлцэх аж.