ЕБС-ийн 2011-2012 оны хичээлийн жилд нэгдүгээр ангид элсэх сурагчдын бүртгэл дуусч байна. Жил бүр нэгдүгээр ангид бүртгүүлсэн элсэгчдийн бэлтгэл хаврын бүртгэлийн дараа 14 хоног үргэлжилдэг байсан бол энэ жилээс  эхлэн хичээлийн шинэ жилтэй зэрэгцэн эхлэх нь ээ. Энэ нь манай улс 12 жилийн  сургалтын тогтолцоонд бүрэн шилжсэнтэй холбоотой гэнэ. Нэгдүгээр ангийн сурагчид есдүгээр сарын 1-нээс дөрвөн долоо хоног бэлтгэл хичээлд хамрагдан тав дахь долоо хоногоос нэмэлт хичээлүүд нь орж эхлэх юм байна. Үүнтэй холбогдуулан нэгдүгээр ангийн сурагчдад заах хичээлүүдийн сургалтын агуулга, хөтөлбөр шинэчлэгдсэнээр сурах бичгийг нь давхар шинэчилжээ. Улсын хэмжээнд 2011-2012 оны хичээлийн жилд 200 мянга гаруй зургаан настай хүүхэд ЕБС-д элсэн орно гэсэн урьдчилсан тооцоо гарсан байна.