Өнөөдөр өглөө таван толгойн нүүрсний орд газарт хөрөнгө оруулагчийг сонгох Ажлын хэсэг техникийн саналдаа авбал зохих босго оноог авсан оролцогчдын ирүүлсэн “Санхүүгийн санал”-ыг нээлээ. 

Бүтүүмжилсэн “Санхүүгийн санал”-ыг нээхдээ зохих журмын дагуу хөрөнгө оруулахаар өрсөлдөж буй хоёр талын төлөөллийг байлцуулан, ирүүлсэн саналуудыг уншиж танилцуулсан юм.

Үүний дараа Ажлын хэсгийн ахлагч Монгол Улсын сайд М.Энхсайхан, нарийн бичгийн дарга “Эрдэнэс Тавантолгой” ХК-ийн гүйцэтгэх захирал Я.Батсуурь нар Чайна Шэнхуа Энержи, Сумитомо корпораци, Энержи Ресурс ХХК-ийн хамтарсан түншлэл, болон Пибоди Энержи корпорацийн төлөөлөгчидтэй уулзалт хийлээ.

Хөрөнгө оруулагчид Таван толгойн нүүрсний орд газарт хөрөнгө оруулахаар ирүүлсэн саналаа танилцуулж, харилцан мэдээлэл солилцсон юм.

Төрийн болон төрийн бус байгууллага, төрийн өмчит компаниудын төлөөллөөс бүрдсэн Ажлын хэсэг оролцогчдын техникийн болон санхүүгийн саналыг үнэлж хамгийн өндөр оноо авсан оролцогчтой Таван толгойн ордод “Хөрөнгө оруулж хамтран ажиллах гэрээ” байгуулах хэлэлцээг эхлүүлэх юм.

Өмнөх мэдээлэл