Холливудын оддын дунд сайхнаараа ч, сайнаараа ч үргэлж гайхуулдаг хосуудын нэг бол яахын аргагүй Брэд Питт, Анжелина Жоли нар. Хаашаа алга болсон нь мэдэгдэхгүй сураг тасарч байснаа тэсрэлт хийн гэнэт гарч ирдэг жүжигчин бүсгүй сүүлийн үед “Кунг Фу Панда 2” кинонд дуу оруулаад тун завгүй байсан бололтой.

Харин эр нөхөр Питт нь “The Tree Of Life” киноныхоо зураг авалтыг саяхан дуусгаж, амсхийх завтай болоод буй. Питтийн хувьд чамгүй хугацаа, хүч хөдөлмөр зарцуулж бүтээсэн кино нь мягмар гаригт Лос-Анжелес хотод нээлтээ хийсэн бөгөөд амьдралын модоо хамтдаа тарьж, усалж, ургуулж яваа хосууд киноныхоо нээлтийн арга хэмжээнд ёслол төгөлдөр хүрэлцэн иржээ.