Хүүхдийн баяр болоход хэдхэн хоног үлдээд байгаа энэ өдрүүдэд “Пиноккиогийн адал явдал” хүүхдийн жүжгийг тавихаар уран бүтээлчид ажилдаа оржээ. Нийслэл хотын Засаг дарга бөгөөд Улаанбаатар хотын захирагч Г.Мөнхбаярын хүсэлт, санаачлагын дагуу уран бүтээлийн “Боролдой”, “Жи энтертайнмент” студи хамтран  дэлхийн сонгодог зохиол болох “Пиноккиогийн адал явдал” хүүхдийн жүжгийг өөрсдийн нөөц бололцоогоо ашиглан ийн тавих гэж байна.

Уран бүтээлчид хүүхдэд зориулан бүтээл туурвихад  чадал нь хүрдэггүй, эсвэл ашиг олоход бэрх байдгаас шалтгаалан эмгэнэлт, уянгын, эротик жүжгүүд олноор төрж хүүхдэд зориулсан бүтээл ховордох болсон. Харин “Боролдой” студийн захирал  С.Мягмарын хэлснээр Улаанбаатар хотын соёл гэгээрлийн томоохон төв, соёл урлагийн лаборатори театр болохын хувьд “Black Box” театр нь хүүхдүүдэд зориулсан олон бүтээлийг тавихаар төлөвлөж байгаа гэнэ.