Америкийн кино зураглаачдын холбооноос жил бүрийн хоёрдугаар сард зохион байгуулдаг “Америкийн шилдэг кино зураглаач”-ийг шалгаруулах ёслол буюу "29th ASC Annual Awards" наадмыг Монгол Улсыг төлөөлөн “News.mn” агентлаг анх удаа бүрэн эрхтэйгээр сурвалжлахаар боллоо.

Эл ёслолд дэлхийн алдартай кино зураглаачид, найруулагчид, жүжигчид, дуучид хүндэт зочид, шагналд нэр дэвшигчид болон ивээн тэтгэгч байгууллагуудын төлөөлөгчид оролцох юм.

Түүнчлэн ивээн тэтгэгч, кино үйлдвэрлэгч "Universal Studios", "Warner Bros", "Paramount Pictures", "Sony pictures" кино түгээгч байгууллагуудын төлөөлөгчид уг наадамд оролцох бөгөөд дэлхийн алдартай 1600 уран бүтээлч оролцох тус наадамд “News.mn” сайтын урлагийн сэтгүүлч Э.Тэмлүүн Монгол Улсаа төлөөлөн хүндэт зочноор оролцохын зэрэгцээ наадмыг бүрэн эхээр нь сурвалжлах эрхтэйгээр хоёрдугаар сард АНУ-ын Лос Анжелас хотыг зорих гэж байна.

Тэрээр Холливудын томоохон наадмуудын нэгд тооцогдох эл арга хэмжээний хүндэтгэлийн зоог, шилдэг зураглаач шалгаруулах наадмын шагнал гардуулах ёслол, After party зэрэг арга хэмжээнд оролцон, сурвалжилж уншигчдадаа хүргэх юм.

“Америкийн шилдэг кино зураглаач”-ийг шалгаруулах ёслолыг сурвалжлах үйл явцад хамтарч ажиллах хүсэлтэй байгууллага хамт олонд бидний зүгээс нээлттэй.

Сонирхуулахад, бидний энэ удаагийн төсөл нь Монголын сэтгүүл зүйн салбараас Холливудын томоохон наадмыг бүрэн эрхтэйгээр сурвалжилж, хүндэт зочноор уригдаж байгаа анхны тохиолдол юм.

Б.ЭНХ