Жил бүрийн шинэ жилийн баяраар айл гэр, найз нөхөд, хамт олноороо баярын салют буудуулах сонирхол хүн бүрт байдаг биз ээ. Гэвч жил ирэх бүрт баярын салют нь аюулгүйн болоод, чанарын шаардлага хангаагүйн улмаас хүмүүс эрүүл мэндээрээ хохирох эрсдэл хүлээх нь нэмэгдсээр байгааг мэргэжлийн хүмүүс хэлж байна. Тиймээс шинэ жилийн баярын арга хэмжээг зүй зохистой тэмдэглэн өнгөрүүлэх, иргэдийг болзошгүй аюулаас урьдчилан сэргийлэх, пиротехникийн хэрэгслийг хууль бусаар хадгалах, ашиглах, худалдан борлуулах явдлыг таслан зогсоох зорилгоор “Пиротехникийн хэрэгсэл” нэгдсэн арга хэмжээг арванхоёрдугаар сарын 10-ны өдрөөс эхлүүлжээ. Энэхүү шалгалт ирэх нэгдүгээр сарын 1 хүртэл Улаанбаатар хотын хэмжээнд зохион байгуулах юм байна. Нийслэлийн онцгой байдлын газар, Мэргэжлийн хяналтын газартай хамтран пиротехникийн хэрэгсэл худалдан борлуулдаг аж ахуй нэгжийн үйл ажиллагаанд хяналт тавих аж.

О.САР