“Үндэсний соёл амралтын хүрээлэн” болон “Мон-Уран” компанийн хооронд үүссэн газрын маргаан өдгөө тав дахь жилдээ үргэлжилж байна. “Үндэсний соёл амралтын хүрээлэн” ХХК-ийн зүгээс өөрийн мэдлийн газрыг чөлөөлж авах асуудлаар өнгөрсөн онд Сүхбаатар дүүргийн шүүхэд хандсан билээ. Энэ асуудал хэрхсэнийг сур­валжиллаа. “Үндэсний соёл ам­­ралтын хүрээлэн”  ХХК-ийн Бизнес хөгжлийн газ­­­рын захирал М.Сугартай эхлээд уулзав. Тэр­­бээр “Манай байгууллага үн­­дэсний соёл амралтын хү­рээлэнг тохижуулах, хүүхэд за­луучуудын чөлөөт цагаа зөв боловсон өнгөрүүлэх бо­ломжийг хангах зорилт тавин ажиллаж байгаа.  “Мон-Уран”-тай 0.7 га газрын асуудлаар шүүхдэлцсэн шүү дээ. Саяхан шүүх хурал болж, манай талд шийдвэр гаргасан юм. Улмаар тус компанид “Газрыг чөлөөл” гэсэн шаардлага хүргүүлсэн. Гэтэл одоог хүртэл үүнийг огт биелүүлэхгүй байгаа. Газрыг чөлөөлөх байтугай хашаагаа улам тэлээд байгаа юм. Энэ асуудал үнэхээр ойлгомжгүй байна. Хуулийн байгуулагад ч хандаж үзсэн. Зөвлөгөө авъя гэхээр “Шүүхийн шийдвэр танай талд гарсан юм байна шүү дээ” гэдэг” хэмээлээ.

Газар чөлөөлөх тухай шаардлагыг хүлээн аваад удаагүй байгаа “Мон-Уран” ХХК-ийнхан өнгөрсөн долоо хоногийн баасан гаригт одоо байгаа 0.7 га газрынхаа хэмжээг  томсгох ажлыг хэний ч зөвшөөрөлгүйгээр хийж эхэлсэн ажээ. “Үндэсний соёл амралтын хүрээлэн” компанийн удирдлагууд тус компанийнхантай уулзаж, асуудлыг хэлэлцэхийг оролдсон ч байнга хаалттай байдаг хаалга, “Дарга нар байхгүй” гэдгээс өөр хариулт өгдөггүй хамгаалалтын ажилтнуудыг нь давж чадаагүй байна. Манай сонины зүгээс  ч “Мон-Уран” компанийнхан ямар байр суурьтай байгаа тодруулахаар өчигдөр очив. Гэтэл хамгаалалтын ажилтан нь “Хариулт өгөх хүн байхгүй” гэснээс өөр юм хэлсэнгүй.

 “Үндэсний соёл амралтын хүрээлэн” ХХК-ийнхан Шүүхийн шийд­вэр гүйцэтгэх газарт “Да­раагийн арга хэмжээг авч өгнө үү” гэсэн утгатай мэдэгдлийг хүр­гүүлсэн  боловч одоогоор ха­риулт ирүүлээгүй байгаа   ажээ. Түүнч­­лэн маргаан үүсгээд байгаа 0.7 га газарт чухам хэний, ямар бай­гууллагын зөвшөөрлөөр “Мон-Уран” компани байрласан нь одоог хүртэл тодорхойгүй байна. Тус компанийнхан “Үндэсний соёл амралтын хүрээлэнгийн өмнөх удирдлагуудтай гэрээ хийсэн. Нийс­лэлийн газрын албанаас зөвшөөрөл авсан” гэсэн хариуг өгдөг юм. Харин нийслэлийн Газрын албаны дэд дарга Э.Ариунгэрэлтэй уулзахад “Маргаан үүсгээд буй талбай “Үндэсний соёл амралтын хүрээлэн” компанийн эзэмшлийн газар.  Манай газрын зүгээс “Мон-Уран”-д газар эзэмших  зөвшөөрөл өгсөн зүйл байхгүй. Тиймээс маргааныг тус байгууллагууд өөрсдөө шийдэх байх” гэсэн хариултыг өглөө.

Ямартай ч “Мон-Уран” ком­панийнхан шүүхийн шийдвэрийг биелүүлэхгүйгээр шийдсэн бо­лолтой. Энэ нь тэдний хашаагаа зөв­шөөрөлгүйгээр өргөтгөж байгаагаас тод харагдаж байгаа ажээ. Үндэсний соёл амралтын хүрээлэн нийт 32 га талбайг хамардаг. Одоо талбайн бүх хэсгийг тохижуулаагүй бай­гаа ч  бүтээн байгуулалтын аж­лыг ерөнхий төлөвлөгөөний да­гуу,  шат дараатайгаар өрнүүлнэ гэд­гийг Үндэсний соёл амралтын хү­рээлэнгийн удирдлагууд хэлж байгаа юм. Тиймээс паркын бүх зай, талбайд бүтээн байгуулалтын ажил хийх ерөнхий төлөвлөгөө боловсруулахын тулд өөрийн мэдлийн газраа “Мон-Уран” компаниас буцааж авах зайлшгүй шаардлагатай ажээ. Энэ онд л гэхэд шинээр долоон га газарт бүтээн байгуулалтын ажил өрнүүлэхээр төлөвлөөд байгаа юм байна. Уг талбайд шинэ тоглоом суурилуулах, томоохон байгууламж барих, ногоон байгууламж бий болгох ажлыг хийнэ хэмээн тус компаниас мэдээллээ.

Зохиогчийн эрх:
"Улс төрийн тойм" сонин