Үдэш бүр “UBS” телевизээр гарч буй “Universe Best Songs-2011” фестивалийн гран-при шагналын эзэн тодроход цөөхөн хоног үлдлээ. Тус наадмын эцсийн шатанд шалгарсан шилдэг 25 оролцогч өнөөдөр “Монгол ньюс” хэвлэлийн төвд гала тоглолтынхоо талаар мэдээлэл хийсэн юм.

“UB Palace”-ийн концертын их танхимд энэ сарын 27, 28-нд “Universe Best Songs-2011″ уралдааны шилдэг 25 оролцогчийн гала тоглолт болно. Наадмын оролцогчид эхний өдөр өөрсдийн шилдэг гэсэн бүхнээ үзэгчдэд толилуулах бол хоёр дахь өдөр тус наадмын гран-при шагналын эзэн тодрох ажээ. Мөн тэд фестиваль эхэлсэн цагаас хойшхи дөрвөн сарын хугацаанд хэрхэн өөрчлөгдсөн болон өөр өөрсдийн өвөрмөц ертөнц, дотоод сэтгэл, хүсэл мөрөөдлөө илүүтэйгээр дэлгэн харуулах гэнэ.

Энэ жилийн гран-при шагналын эзэн ирэх сарын 6-нд АНУ-ыг зорьж, Лос-Анжелес, Лас Вегас хотуудаар аялахаас гадна зургадугаар сард Лас Вегаст  болох алдарт дуучин Celine Dion-ы тоглолтыг үзэх гэнэ. Зохион байгуулагчид болоод оролцогчид энэ талаар өчигдөр ярилцан зөвшилцөөд дэлхийн хэмжээний алдарт дуучны тоглолтын тасалбарыг хэдийнэ захиалаад амжжээ. Мөн уламжлал ёсоор тэргүүн байрын шагналтан гурван сая, хоёрдугаар байрын эзэн хоёр сая, гуравдугаар байрт шалгарсан оролцогч 1.5 сая төгрөгийн мөнгөн шагналын эзэн болохоос гадна анхны уран бүтээл болон клип хийлгэх эрхээр тус тус шагнуулах юм.

Түүнчлэн “Universe Best Songs” наадмын нэгэн уламжлал болоод буй кино төсөлд хамрагдана. Тэгэхээр өмнөх хоёр удаагийн наадмын шилдэг 25 оролцогчдын тоглосон “Зүрхэнд гэрэлтэх од”, “Мамма миа” мюкикл кино “дүүтэй” болно гэсэн үг. Шинэхэн кино төслийн зохиол хэдийнэ бэлэн болсон гэнэ.