Дундговь аймаг байгуулагд­­саны 70 жилийн ой, Брагри ёнцон Ц.Дамцагдоржийн мэндэлсний 230 жилийн ойд зориулан зуны эхэн сарын шинийн 15-нд Луваан жалбу бурханг Сайхан-Овоо сумын Онгийн хийдэд залсан байна. Хуучнаар Говь түшээ гүний хошуу буюу одоогийн Сайхан-Овоо сумын нутаг Цогт хэмээх ууланд Онгийн хийд байрладаг. Энэ ууланд нутгийн ард олон аж амьдралынхаа сайн сайхны төлөө, нутаг орноо хур бороотой, цаг тэнүүн байлгаж, газар лусын хилэгнэхийг даадаг Лусын эзэн хаан “Луваан жалбу” бурханг 1850-аад оны үеэс бүтээн шүтэж ирсэн байдаг. Энэ бурханг Дундговь аймгийн Өлзийт, Хулд, Луус, Эрдэнэдалай, Дэлгэрхангай, Сайхан-Овоо, Өмнөговь аймгийн Цогт-Овоо, Цогтцэций, Мандал-Овоо, Ханхонгор сумдын ард олон тахин шүтдэг байжээ. Харамсалтай нь, 1937 онд нутаг усны энэ бурхан эвдэгдэн нураагдсан байна.

Харин өдгөө аймгийн 70 жил, Онгийн хийдийг үүсгэн байгуулсан их багш Дамцагдоржийн мэндэлсний ойд зориулан Луваан жалбу бурханг дахин бүтээн залсан нь энэ. Энэ санаачлагыг Сайхан-Овоо сумын Улаанбаатар дахь нутгийн зөвлөл, Сайхан-Овоо сумын ИТХ, ЗДТГ гаргаж, Дундговь аймгийн Ардчилсан нам, Өлзийт, Дэлгэрхангай сумын ЗДТГ, Гүндүжамбаалин хийд, Үржин­шаддүвлин хийд хамтран зохион байгуулжээ.