-Азийн элсний IV наадамд мутай бокс, орчин үеийн таван төрөлт, петанк зэрэг төрлүүдэд манай улсаас анх удаагаа оролцож байна.-

Тайланд улсын аялал жуулчлалын Пукет хотноо Азийн элсний спортын IV наадам үргэлжилж байна. “Пукет-2014” наадамд Азийн 45 орны тамирчид спортын 17 төрлөөр өрсөлдөж байгаагаас 33 орон ямар нэгэн медаль хүртээд байна. Манай улс 6 алт, 3 хүрэл медаль хүртсэн амжилтаар Тайланд, Японы багийн араас гуравт явна.

Манай улсаас элсний бөх, сагсан бөмбөг, жюү жицү, кураш, мутай бокс, самбо, орчин үеийн таван төрөлт, петанк гэсэн 8 төрлүүдэд өрсөлдөж байна. Тэмцэний сүүлийн өдрүүдэд болж буй мутай бокс, орчин үеийн таван төрөлт, петанк зэрэг төрлүүдэд манай улсаас анх удаагаа оролцож байгаа юм.

Орчин үеийн таван төрөлтийн тэмцээн өнөөдрөөс эхэлж, ирэх баасан гаригт(11.21) өндөрлөж, дүнгээ гаргах юм. Тус тэмцээнд тамирчин Э.Уянга, М.Итгэл оролцож байгаа бөгөөд дасгалжуулагчаар М.Цэнгүүн ажиллаж байна.

Modern pentathlon төрлөөр 8 орны тамирчид оролцож байгаагаас өнөөдөр, маргааш хувийн гараа, нөгөөдөр буюу ирэх баасан гаригт/11.21/ буухиагаар өрсөлдөнө. 

Тамирчин Э.Уянга, М.Итгэл нар тэмцээнд оролцохын өмнө бэлтгэлийн талбайд. 2014.11.18

Гэрэл зургийг Э.МАГНАЙБАЯР.  (Пукет хотоос)

Ч.БОЛОР