АНУ-ын Калифорни мужид болсон дугуйн олон өдрийн тэмцээн өчигдөр дүнгээ гаргалаа. Нийт найман шатны гараанаас хамгийн түрүүнд ахмад дугуйчин Крис Хорнер бусдыгаа тэргүүлж, Калифорнийн тур тэмцээний аварга болжээ. Тэмцээний эхний дөрвөн өдрийн дараагаас лидер болсон Крис Хорнер үлдсэн гурван гараанд тэргүүллээ алдаагүй юм. Долдугаар гараанд тэргүүлэгчийн араас нэхэж байсан гурван удаагийн аварга Леви Лейпфемер түрүүлсэн боловч Крис Хорнер араас нь орж тэргүүллээ хадгалж чадсан байна. Харин сүүлийн шатны гараа Санта Кларитагаас Таусэнд Оакс чиглэлд 129,1 км замд болж Австралийн Мэтью Госс түрүүлсэн байна. Тэрбээр хоёр цаг, 56 минут, 39 секундын амжилтаар шагналын тавцанд гарсан бол араас нь есөн дугуйчин нэгэн зэрэг бариалжээ. Ингэснээр араас нэхэгчээс 38 секундээр тэргүүлж байсан Крис Хорнер Калифорнийн Тур тэмцээний аварга болох нь ойлгомжтой болсон юм. “Радиошак” багийн дугуйчин нийлбэр дүнгээр 23 цаг, 46 минут, 41 секундээр аваргалсан бол Леви Лейпфемер 38 секундын алдагдалтай хоёрдугаар байрт, Том Даниэлсон хоёр минут, 45 секундын алдагдалтай гуравдугаарт оржээ. Залуучуудаас Тежай ван Гарденен цагаан өмсгөлийн эзэн болсон бол уулын төрөлд Пэт МакКартийг гүйцэх дугуйчин байсангүй. Харин багийн үзүүлэлтээр “Гармин Сервело” баг тэргүүн байрт шалгарсан байна.