Нийгмийн хамгаалал, хөдөлмөрийн яамнаас уул уурхай, зам, барилгын салбарт эрэлт хэрэгцээтэй байгаа мэргэжлийн ажилтныг бэлтгэх, иргэдийг ажлын байраар хангах зорилгоор Зам, барилга, уул уурхайн салбарын мэргэжилтэй ажилтан бэлтгэх үйлдвэрлэл дээрх сургалтын хөтөлбөрийг Зам тээвэр, барилга хот байгуулалын яам болон Эрдэс баялаг эрчим хүчний яамтай хамтран хэрэгжүүлж эхэллээ.

Хөдөлмөр эрхлэлтийг дэмжих жилийн ажлын хүрээнд ажлын байрны эрэлт, нийлүүлэлтийн судалгаанд үндэслэн дээрх салбарт мэргэжилтэн бэлтгэх тооцоог гаргаад байна. Үйлдвэрлэл дээрх сургалтын хөтөлбөрөөр ажилтнаа бэлтгэх хүсэлттэй барилга, зам, уул уурхайн аж ахуйн нэгжүүдийг ЗТБХБЯ, ЭБЭХЯ-наас ирүүлсэн жагсаалтын дагуу сонгон шалгаруулалт хийж компаниудыг сонгожээ. Нийслэлийн барилгын 45 аж ахуйн нэгжид 1660 иргэнийг, орон нутгийн барилгын 19 нэгжид 625 иргэнийг, замын 10 нэгжид 304 иргэнийг, уул уурхайн 19 нэгжид 750, нийт 94 аж ахуйн нэгжид 3364  иргэнийг сургах эрхийг Хөтөлбөрийн зохицуулах зөвлөлөөс олгоод байна.

Ажил хөдөлмөр эрхлэх сонирхолтой иргэд, залуучуудыг тус үйлдвэрлэл дээрх сургалтад хамруулж мэргэжлийн онцлогоос хамаарсан сургалтын зардал болох 380,000-550,000 төгрөгийг тухайн аж ахуйн нэгжид, хоолны 1000, унааны 500 төгрөгийг суралцагчид олгож  гурван сарын хугацаанд ажлын байрандаа сургалт зохион байгуулж ажил олгогчид улмаар өөрийн үндсэн ажилтан болгон авах юм.

Хөтөлбөрт хамрагдах хүсэлттэй ажилгүй болон ажил хайж буй иргэд иргэд аймаг,  дүүргийн Хөдөлмөр, халамжийн хэлтсээс болон НХХЯ-ны www.mswl.gov.mn цахим хуудаснаас оролцож буй аж ахуйн нэгжийн нэрсийг авч,  аймаг, дүүргийн Хөдөлмөр халамжийн үйлчилгээний хэлтэс, Хөдөлмөрийн төв биржид /Меркури захын хойно байрлах/ очих, биржийн  www.labornet.mn цахим хуудас болон 70121287, 70128786  утсаар бүртгүүлэн үйлдвэр дээрх сургалтад  хамрагдах боломжтой гэнэ.

Үйлдвэр дээрх сургалтын хөтөлбөрт 2009 онд барилгын  67 аж ахуйн нэгжид 2407 иргэн, замын  14 аж ахуйн нэгжид 560 иргэнийг, уул уурхайн 12 аж ахуйн нэгжид  589 иргэн бэлтгэсэн бол 2010 онд нийслэлийн барилга, замын 50 аж ахуйн нэгжид 1680 иргэнийг, орон нутгийн барилга замын салбарт 22 аж ахуйн 685 иргэнийг, уул уурхайн салбарын 15 аж ахуйн нэгжид 820 иргэнийг хамруулж жил бүр Хөдөлмөр эрхлэлтийг дэмжих сангаас 1.5  тэрбум төгрөгийг үйлдвэр дээрх сургалтын хөтөлбөрийн санхүүжилтэд зарцуулсан байна.